မိုင်းရူပ၊ ဇူလိုင် ၅ ရက်၊ နောင်ချို
စစ်ကောင်စီထိုးစစ်ဆင်တိုက်ခိုက်နေတဲ့ တအာင်းတပ်ထိန်းချုပ်ထားတဲ့ နောင်ချိုမြို့ကို စစ်ကောင်စီတပ်ထံ လက်မလွှတ်ရရေးအတွက် ဆက်လက်ခုခံကာကွယ်သွားမယ်လို့ PSLF/TNLA ရဲ့ ပြောရေးဆိုခွင့်ရှိသူ လွေးယေဦးက ဒီနေ့ ဇူလိုင် ၅ရက်မှာ ပြုလုပ်တဲ့ သတင်းစာရှင်းလင်းပွဲမှာ ပြောပါတယ်။
“လက်ရှိအချိန်အထိ ကျမတို့ နောင်ချိုကို လက်လွှတ်ရတာမျိုး၊ နောင်ချိုလက်လွှတ်ဖို့ ဆုံးဖြတ်ချတာမျိုး မရှိသေးပါဘူး။ ခုခံကာကွယ်ဖို့အတွက် အကောင်းဆုံး ပြင်ဆင်ထားပါတယ်” လို့ ပြောကြားခဲ့ပါတယ်။
လူထုတွေအနေနဲ့ နောင်ချိုတိုက်ပွဲအခြေအနေနဲ့ ပတ်သက်ပြီး စစ်ကောင်စီလော်ဘီဝါဒဖြန့်နေတာတွေကို မယုံကြည်ကြဖို့ လွေးယေဦးက တိုက်တွန်းထားပါတယ်။
စစ်ကောင်စီတပ်ဟာ ၎င်းတို့လက်လွှတ်ထားရတဲ့ နောင်ချိုမြို့ကို ပြန်ရဖို့စစ်အင်အားထောင်နဲ့ချီအသုံးပြုကာ တောင်းခမ်းနဲ့ အုမ္မတီးကျေးရွာဘက်ကနေ ထိုးစစ်တိုက်ခိုက်နေပြီး TNLA တပ်ဘက်ကလည်း နောင်ချိုမြို့လက်မလွတ်ရရေး ဆက်လက်ခုခံနေဆဲ ဖြစ်ပါတယ်။
လက်ရှိ နောင်ချိုမြို့နယ် အုမ္မတီးကျေးရွာကနေ ထိုးစစ်ဆင်လာတဲ့ စစ်ကောင်စီစစ်ကြောင်းဟာ နောင်ချိုမြိုနဲ့ ၄ မိုင်အကွာ ကျောက်ကြမ်းရွာအနီးကို ရောက်ရှိလာတယ်လို့ ရှေ့တန်းစစ်မြေပြင်မှာ ရှိနေသူတစ်ဦးက ရွှေဖီမြေကို ပြောပါတယ်။
နောင်ချိုမြို့နယ် တောင်းခမ်းဘက်နေ ထိုးစစ်ဆင်လာတဲ့ စစ်ကောင်စီတပ်ကတော့ နောင်ချိုမြို့နဲ့ ၄ မိုင်ဝန်းအကွာ မျက်ချင်းနုကျေးရွာမှာ ရောက်ရှိနေပြီး တိုက်ပွဲတွေ ဆက်ဖြစ်နေပါတယ်လို့ ဆိုပါတယ်။
“အုမ္မတီးဘက်က စကစတွေ ကျောက်ကြမ်းရွာနားရောက်ပြီ။ ကျောက်ကြမ်းရွာတော့ မရောက်သေးဘူး။တောင်းခမ်းဘက်တော့ မျက်ချင်းနုနဲ့ ရွာကျော်ပြီ။ တိုက်ပွဲက ဆက်ပြင်းထန်နေတယ်” လို့ ရှေ့တန်းစစ်မြေပြင်မှာ ရှိနေသူတစ်ဦးက ရွှေဖီမြေကို ပြောပါတယ်။
နောင်ချိုမြို့အခြေစိုက် စစ်ကောင်စီရဲ့ အမှတ်(၆၀၆) ဒုံးတပ်ရင်းအပါအဝင် ခြေမြန်တပ်ရင်း-၁၁၄၊ ခမရ- ၁၁၅ တို့ကို တိုက်ခိုက်သိမ်းနိုင်ထားပြီး နောင်ချိုမြို့ကို ပြီးခဲ့တဲ့ ၂၀၂၄ ခုနှစ် ဇူလိုင် ၃၀ ရက်မှာ ထိန်းချုပ်နိုင်ခဲ့တာ ဖြစ်ပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
