မိုင်းရူပ၊ နော်ဂျား၊ ဇွန်လ ၂၀ ရက်၊ မူဆယ်
စစ်ကောင်စီတပ် ထိန်းချုပ်ထားတဲ့ ရှမ်းမြောက် တရုတ်-မြန်မာနယ်စပ် မူဆယ်မြို့မှာ စစ်ကောင်စီတပ်က ကျားဖြန်ရုံတွေကို လိုက်လံစီးနင်းပြီးနောက် ကျားဖြန်ရုံတွေက နေရာပြောင်းရွှေ့ပြီး လုပ်ကိုင်နေကြတယ်လို့ ရွှေဖီမြေက စုံစမ်းသိရှိရပါတယ်။
ပြီးခဲ့တဲ့ ဇွန်လ ၁၆ ရက်မှာ မူဆယ်မြို့ရှိ ကျားဖြန်ရုံတွေကို စစ်ကောင်စီတပ်က လိုက်လံစီးနင်းပြီးနောက် ကျားဖြန်ရုံတွေက အခုလို နေရာပြောင်းရွှေ့ပြီး လုပ်ကိုင်နေကြတာ ဖြစ်ပါတယ်။
“စဖမ်းကတည်းက ရွေ့ကြတာ။ ရုံတွေမှာ မနေရဲကြတော့ဘူး။ တချို့က အိမ်တွေမှာ လိုက်နေတာရှိတယ်။ တချို့ ကျားဖြန်လုပ်တဲ့သူတွေက အိမ်ပြန်ကြတာရှိတယ်” လို့ မူဆယ်မြို့ရှိ ကျားဖြန်ရုံတစ်ခုမှ အလုပ်လုပ်ကိုင်နေသူတစ်ဦးက ရွှေဖီမြေကို ပြောပါတယ်။
ပြီးခဲ့တဲ့ ဇွန်လ ၁၆ ရက်မှာ မူဆယ်မြို့ စွမ်စော်နဲ့ ကောင်းမူတုံရပ်ကွက်ရှိ ကျားဖြန်ရုံကို စစ်ကောင်စီတပ်က ဝင်ရောက်စီးနင်းခဲ့ရာ တရုတ်နိုင်ငံသား ၄၁ ဦးနဲ့ မြန်မာနိုင်ငံသား ၉၇ ဦးကို စုစုပေါင်း ၁၄၈ ဦးကို ဖမ်းဆီးရမိခဲ့ပါတယ်။
လက်ရှိ မူဆယ်မြို့မှာ ကျားဖြန်ရုံပေါင်း ၁၀၀ နီးပါးရှိပြီး စစ်ကောင်စီတပ်နဲ့ ၎င်းလက်အောက်ခံ ပူးပေါင်းတပ်ဖွဲ့တွေ လိုက်လံဖမ်းဆီးခဲ့တဲ့ ကျားဖြန်ရုံတွေဟာ ၎င်းတို့ထံ လိုင်းကြေးမပေးဆောင်ပဲ ဖွင့်လှစ်နေတဲ့ရုံတွေ ဖြစ်တယ်လို့ မူဆယ်မြို့ရှိ စစ်ကောင်စီနဲ့ နီးစပ်သူတွေက ပြောပါတယ်။
“အခုက ရဲတွေတင် မဟုတ်ဘူး။ သူတို့ရဲ့ သတင်းပေးတွေကပါ လစဥ်ကြေး ရချင်နေကြတာ။ ရဲတွေက အကူညီတော့ မပေးဘူး။ ဒုက္ခတော့ ပေးတတ်ကြတယ်။ ဒါကြောင့် တောင်းသလောက်ပေးနေရတာ။ ရင်းနှီးပါတယ်ဆိုတဲ့ SB က ရဲမှူးဇော်မင်းလတ်ဆိုရင် ၂ ရက်လောက် နောက်ကျတာကို ဖမ်းလိုက်ရမလားဆိုပြီး မေးဖူးတယ်။ သူတို့မှာ လူရင်းဆိုတာ မရှိဘူး။ ငွေရှိမှ ပေါင်းကြတာ” လို့ ကျားဖြန့်ရုံနဲ့ နီးစပ်သူတစ်ဦးက ရွှေဖီမြေကို ပြောပါတယ်။
မူဆယ်မြို့မှာ အွန်လိုင်းငွေလိမ်ဂိုဏ်းလုပ်ကိုင်သူ တရုတ်နိုင်ငံသားအပါအဝင် မြန်မာနိုင်ငံသား ၅ သောင်းနီးပါးလည်း ပါဝင်လုပ်ကိုင်နေကြတယ်လို့ မူဆယ်မြို့မ ရဲစခန်းရှိ ရဲဝန်ထမ်းတစ်ဦးက ရွှေဖီမြေကို ပြောဆိုထားပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
