မိုင်းရူပ၊ ဒီဇင်ဘာ ၂၂ ရက်
စစ်ကောင်စီရဲ့ ဗုံးကြဲတိုက်ခိုက်မှုကြောင့် လူထုတွေရဲ့ နေအိမ်အပါအဝင် ပျက်စီးဆုံးရှုံးမှုများခဲ့တဲ့ ရှမ်းမြောက် ကျောက်မဲနဲ့ သီပေါမြို့တွေမှာ စစ်ကောင်စီရဲ့ ပြန်ကြားရေးဝန်ကြီး ဦးမောင်မောင်အုန်းက ဘုရားဆင်းတုတော်နဲ့ MRTV စလောင်းလာရောက် လှူဒါန်းခဲ့တယ်လို့ သိရပါတယ်။
ပြီးခဲ့တဲ့ ဒီဇင်ဘာ ၁၉ ရက်နဲ့ ၂၀ ရက်တွေမှာ သီပေါနဲ့ ကျောက်မဲမြို့ကို ပြန်ကြားရေးဝန်ကြီး ဦးမောင်မောင်အုန်းနဲ့ အနုပညာရှင်တချို့က လူထုတွေနဲ့ လာရောက်တွေ့ဆုံပြီး လှူဒါန်းခဲ့တယ်လို့ စစ်ကောင်စီက ထုတ်ပြန်ထားပါတယ်။
ဒီတွေ့ဆုံပွဲကို စစ်ကောင်စီက ပြန်ကြားရေးနဲ့ တိုးတက်ခိုင်မာအားကောင်းတဲ့ လူမှုအသိုက်အဝန်း ဖော်ဆောင်ရေး တွေ့ဆုံမှုအဖြစ် စစ်ကောင်စီက ကျင်းပခဲ့တာဖြစ်တယ်လို့ ဆိုပါတယ်။
ကျောက်မဲနဲ့ သီပေါမြို့ကို တအာင်းတပ်မတော် TNLA က ထိန်းချုပ်စဉ် စစ်ကောင်စီရဲ့ ဗုံးကြဲတိုက်ခိုက်မှုကြောင့် လူထုတွေရဲ့ နေအိမ် ရာနဲ့ချီ ပျက်စီးခဲ့ရပြီး ပျက်စီးသွားတဲ့ နေအိမ်တွေကို လက်ရှိအချိန်အထိ မပြုပြင်နိုင်သေးဘူးလို့ ကျောက်မဲမြို့ခံတစ်ဦးက ရွှေဖီမြေကို ပြောပါတယ်။
“တော်တော်များများကတော့ မပြင်ဘဲနဲ့ ဒီတိုင်းထားတာများတယ်။ ငွေအင်အားမရှိတာရယ် နိုင်ငံရေး ပြန်ရှုပ်ရင် ပြန်ပျက်မှာ ကြောက်တာရယ် ပါတယ်” လို့ ဆိုပါတယ်။
ဒါ့အပြင် စစ်ကောင်စီရဲ့ ပြည်ထောင်စုဝန်ကြီးက သီပေါမြို့မှာ မကြာမီ ရွေးကောက်ပွဲ ကျင်းပဖို့ ရှိနေတာကြောင့် နယ်မြေဒေသ ကောင်းကျိုးဖော်ပေးနိုင်မယ့်သူကို မဲပေးဖို့ ပြောကြားခဲ့ပါတယ်။
ကျောက်မဲနဲ့ သီပေါမြို့ လူထုတွေ့ဆုံပွဲ လာရောက်ဖျော်ဖြေပေးတဲ့ အနုပညာရှင်တွေကတော့ ဆုပန်ထွာ၊ ပွင့်၊ ဆောင်းယုစံ၊ စည်သူဝင်း၊ သံသာမိုးသိမ့် စတဲ့ အနုပညာရှင်တွေ ပါဝင်တယ်လို့ သိရပါတယ်။
တအာင်းတပ် ထိန်းချုပ်ခဲ့တဲ့ ကျောက်မဲနဲ့ သီပေါမြို့ကို ပြီးခဲ့တဲ့ အောက်တိုဘာလထဲမှာ စစ်ကောင်စီက ပြန်လည်သိမ်းယူနိုင်ခဲ့တာ ဖြစ်ပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
