မိုင်းရူပ၊ ဇူလိုင် ၁ ရက်၊ နောင်ချို
တအာင်းတပ်မတော်-TNLA ထိန်းချုပ်ထားတဲ့ နောင်ချိုမြို့ကို ပြန်ရဖို့ ထိုးစစ်ဆင်တိုက်ခိုက်နေတဲ့ စစ်ကောင်စီတပ်ဟာ နောင်ချိုမြို့အနီး မျက်ချင်းနုကျေးရွာအထိရောက်လာပြီလို့ ရွှေဖီမြေက စုံစမ်းသိရှိရပါတယ်။
မျက်ချင်းနုကျေးရွာဟာ TNLA ထိန်းချုပ်ထားတဲ့ နောင်ချိုမြို့နဲ့ ၄ မိုင်ဝန်းကျင်သာ ကွာဝေးပြီး မနေ့ ဇွန်လ ၃၀ ရက်အထိ မျက်ချင်းနုနဲ့ နောင်သြကျေးရွာမှာ စစ်ကောင်စီနဲ့ TNLA အကြား တိုက်ပွဲပြင်းထန်နေတယ်လို့ နောင်ချိုဒေသခံတစ်ဦးက ရွှေဖီမြေကို ပြောပါတယ်။
“တိုက်ပွဲတွေက နောင်သြနဲ့ မျက်ချင်းနုဘက်မှာ ဖြစ်နေတယ်။ စကစတွေက မျက်ချင်းနုရွာအထိ ရောက်လာပြီ” လို့ ဆိုပါတယ်။
စစ်ကောင်စီထောက်ခံတဲ တယ်လီဂရမ်ချန်နယ်တွေမှာတော့ မျက်ချင်းနုနဲ့ နောင်သြကျေးရွာကို စစ်ကောင်စီတပ်က မနေ့ ဇွန်လ ၃၀ ရက်မှာ ထိန်းချုပ်နိုင်ပြီလို့ ဝါဒဖြန့် ရေးသားဖော်ပြနေကြပါတယ်။
တအာင်းတပ်ဘက်ကတော့ ဇွန်လ ၂၇ ရက်အထိသာ နောင်ချိုတိုက်ပွဲသတင်း ထုတ်ပြန်ထားတာတွေ့ရပြီး လုံစံ၊ မျက်ချီးနု၊ လုံဝယ်၊ ဉာဏ်တော၊ နောင်လင်နဲ့ နောင်သြစတဲ့ကျေးရွာတွေမှာ စစ်ကောင်စီနဲ့ TNLA အကြား တိုက်ပွဲပြင်းထန်နေတယ်လို့ ထုတ်ပြန်ထားပါတယ်။
စစ်ကောင်စီတပ်ဟာ ၎င်းတို့လက်လွှတ်ထားရတဲ့ နောင်ချိုမြို့ကို ပြန်ရဖို့ စစ်အင်အားထောင်နဲ့ချီအသုံးပြုပြီး ထိုးစစ်တိုက်ခိုက်နေပြီး TNLA တပ်ဘက်ကလည်း နောင်ချိုမြို့လက်မလွတ်ရရေး ဆက်လက်ခုခံနေဆဲ ဖြစ်ပါတယ်။
နောင်ချိုမြို့အနီးက တိုက်ပွဲတွေကြောင့် နောင်ချိုမြို့ပေါ်နဲ့ နောင်ချိုမြို့အနီးက ထောင်နဲ့ချီတဲ့ ဒေသခံတွေ ဘေးလွတ်ရာကို ထွက်ပြေးတိမ်းရှောင်နေကြရတယ်လို့ သိရပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
