မိုင်းရူပ၊ ဇွန်လ ၉ ရက်၊ နောင်ချို
တအာင်းတပ်မတော်-TNLA ထိန်းချုပ်ထားတဲ့ ရှမ်းမြောက် နောင်ချိုမြို့အနီး ကံကြီးကျေးရွာမှာ တိုက်ပွဲဆက်လက်ပြင်းထန်နေပြီး စစ်ကောင်စီတပ်ထံ လက်လွှတ်ခဲ့ရတဲ့ နေရာအချို့ကို TNLA ပြန်ထိန်းချုပ်နိုင်ခဲ့တယ်လို့ ရှေ့တန်းစစ်မြေပြင်မှာ ရှိနေသူတွေက ရွှေဖီမြေကို ပြောပါတယ်။
ဒီနေ့ ဇွန်လ ၉ ရက် မနက် ၈ နာရီ ၄၀ မိနစ်မှာ စစ်ကောင်စီတပ်ဘက်က ကံကြီးရွာထဲကို ထိုးစစ်ဆင်နေပြီး တိုက်ပွဲပြင်းထန်နေတယ်လို့ ဆိုပါတယ်။
“ကံကြီးရွာထဲကို စစ်ကောင်စီနေတဲ့နေရာကို TNLA က ပြန်ရတာရှိတယ်။ တစ်ရွာလုံးကို ထိန်းချုပ်နိုင်တာတော့ မရှိဘူး။ TNLA တစ်ဖက်၊ စစ်ကောင်စီတစ်ဖက်ပေါ့။ ဒီနေ့ စစ်ကောင်စီဘက်က ပြန်ထိုးနေတော့ ဘာဆက်ဖြစ်မလဲ မပြောတက်သေးဘူး” လို့ ရှေ့တန်းစစ်မြေပြင်မှာ ရှိနေသူတစ်ဦးက ရွှေဖီမြေကို ပြောပါတယ်။
ပြီးခဲ့တဲ့ ဇွန်လ ၆ ရက်မှာ ကံကြီးရွာထဲကို ရောက်ရှိလာတဲ့ စစ်ကောင်စီစစ်ကြောင်းဟာ နောင်ချိုမြို့ဘက်သို့ ထိုးစစ်ဆင်ဖို့ ကြိုးစားနေပြီး TNLA တပ်ဘက်ကလည်း အပြင်းအထန်ခုခံနေတာ ဖြစ်ပါတယ်။
နောင်ချိုမြို့နယ်ထဲက တိုက်ပွဲအခြေအနေနဲ့ ပတ်သက်ပြီး အသေးစိပ်သိရဖို့ PSLF/TNLA ရဲ့ ပြောရေးဆိုခွင့်ရှိသူ လွေးယေဦးကတော့” ကံကြီးဘက်မှာ တိုက်ပွဲတွေ ပြင်းထန်နေပါတယ်။ အခြားအခြေအနေကိုတော့ အတည်ပြုနိုင်တာ မရှိသေးပါဘူး”
တိုက်ပွဲတွေ ရောက်လာတာကြောင့် မြို့အနီးရှိ ကျေးရွာ ၈ ရွာက ဒေသခံတွေနဲ့ နောင်ချိုမြို့တွင်းရှိ လူထုတွေဟာ နီးစပ်ရာကျေးရွာတွေနဲ့ ကျောက်မဲမြို့ဘက်ကို ထွက်ပြေးတိမ်းရှောင်နေရတယ်လို့ ဒေသခံတွေက ရွှေဖီမြေကို ပြောပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
