ရဲမာန်၊ ဇွန်လ ၁၁ ရက်၊ ရွာငံ
ပြည်သူ့များတပ်ဖွဲ့(P.S.F) တာ၀န်ခံ ဗိုလ်မီးခဲ လုပ်ကြံခံရပြီး သေဆုံးသွားခဲ့ကြောင်း ဓနုပြည်နယ်အမျိုးသားကာကွယ်ရေးတပ်တော်(DSNDA)က ထုတ်ပြန်ထားပါတယ်။
ပြီးခဲ့တဲ့ ဇွန်လ ၇ ရက်နေ့မှာ ဗိုလ်မီးခဲက ဖျားနာနေတဲ့ တော်လှန်ရေးရဲဘော်ကို သွားကြိုရင်း ည ၁၂နာရီ၀န်းကျင်ခန့် ရွာငံတစ်နေရာမှာ ဓားနဲ့လုပ်ကြံခံရတယ်လို့ (DSNDA)တာ၀န်ခံက ရွှေဖီမြေကို ပြောပါတယ်။
“အခြားရဲဘော်တွေပါပေမဲ့ ဆိုင်ကယ်ပျက်တော့ လူက ရှေ့နောက် အရမ်းကွာသွားတဲ့အချိန်မှာ ဖြစ်သွားတာပါ”လို့ (DSNDA)တာ၀န်ခံက ပြောပါတယ်။
ဗိုလ်မီးခဲ(PS-1001)က ပြည်သူ့သားများတပ်ဖွဲ့ရဲ့ တာ၀န်ခံတစ်ဦးဖြစ်ပြီး တာ၀န်ထမ်းဆောင်နေတဲ့ ကာလအတွင်းမှာ ကိုယ်စွမ်း ဉာဏ်စွမ်းရှိသလောက် တာ၀န်ထမ်းဆောင်သူ ဖြစ်တယ်လို့ (P.S.F)ကလည်း ထုတ်ပြန်ထားပါတယ်။
“ပြောမပြတက်လောက်အောင်ပါဘဲဗျာ။ တော်လှန်ရေးအတွက်တော့ သူ့လို ခေါင်းဆောင်တစ်ယောက် ပြန်ရဖို့ မလွယ်တဲ့အတွက် ကြီးမားတဲ့ ဆုံးရှုံးမူ တစ်ခုပါဘဲ”လို့ ၎င်းကဆက်ပြောတယ်။
ပြည်သူ့များတပ်ဖွဲ့(P.S.F)ဟာ DSNDA နဲ့အတူ အခြေခံစစ်သင်တန်းအပတ်စဉ် ၁ ကို ပြီးခဲ့တဲ့ မတ်လအတွင်း ရှမ်းတောင် ရွာငံမြို့နယ်ထဲမှာ ပြုလုပ်ခဲ့ပြီး ရွာငံထဲမှာ စစ်ရေးလှုပ်ရှားနေတဲ့ အဖွဲ့ဖြစ်ပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
