ဝတ်ရည်၊ ဇွန်လ ၁၀ ရက်၊ ရွှေကူ
ကချင်ပြည်နယ် ရွှေကူမြို့အဝင် လမ်းမကြီးနဲ့ ငါးအိုး-ရွှေကူလမ်းမကြီးကို ရက်အကန့်အသတ်မရှိ အသုံးပြု သွားလာခွင့် ပိတ်လိုက်ပြီဖြစ်ကြောင်း ကချင်တပ် KIA က ပြီးခဲ့တဲ့ ဇွန်လ ၈ ရက်မှာ စာထုတ်ပြန်ထားပါတယ်။
ရွှေကူမြို့ပေါ်မှာရှိတဲ့ ဒေသခံအားလုံးလည်း မြို့ပေါ်ကနေ ထွက်ခွါဖို့ သတိပေးထားသလို တော်လှန်-လမ်းကူး- စီသာ- မိုးကင့်နဲ့ စီဖွားလမ်းပိုင်းကိုသာ အသုံးပြု သွားလာကြဖို့ကို ထုတ်ပြန်ပြောဆိုထားပါတယ်။
ဒေသခံတစ်ဦးပြောတာက “မြို့ပေါ်ကနေ မထွက်ပဲ နေလို့ တိုက်ပွဲဖြစ်ရင် ဒုက္ခရောက်ကြမှာ။ တချို့ကျ တခြားနယ်မှာ သွားဖို့ ငွေကြေးအဆင်မပြေတာတွေ ရှိတယ်လေ။ ငွေကြေးအဆင်ပြေတဲ့သူတွေတော့ စာထုတ်ပြန်တဲ့နေ့ကတည်း ပြောင်းကုန်ကြပြီလေ” လို့ ပြောပါတယ်။
ဒါ့အပြင် ကန့်သတ်ပိတ်ပင်ထားတဲ့ လမ်းပိုင်းကို အသုံးပြု သွားလာတဲ့ ဒေသခံတွေနဲ့ မြို့ပေါ်ကနေ မထွက်ခွါပဲ ကျန်ရှိနေတဲ့ ဒေသခံတွေအနေနဲ့ နောက်ဆက်တွဲဖြစ်လာမယ့် ပြဿနာကို KIA က လုံးဝတာဝန်မယူကြောင်းကိုလည်း ထုတ်ပြန်ချက်ထဲ ဆက်လက်ဖော်ပြထားပါတယ်။
“စစ်တပ်ဘက်က ဖားကန့် မရှီကထောင်ဘက်မှာလည်း အင်အားတွေ ဆက်တိုက်ဖြည့်နေတာ။ ရခိုင်ကုန်းဘက်မှာလည်း ဖြည့်တယ်။ မိုင်းခွဲတာတွေတော့ နေ့တိုင်းရှိတယ်။ တိုက်ပွဲက ပြန်ပြင်းထန်လာနိုင်တဲ့ အခြေအနေတော့ ရှိတယ်လို့ ပြောရမှာပေါ့။ စစ်ရေးသတိရှိကြဖို့လည်း လိုပါတယ်” ဆိုပြီး အထက်ပါ ဒေသခံက ဆက်ပြောပါတယ်။
လက်ရှိမှာ မြေပြင်ထိတွေ့တိုက်ပွဲ ဖြစ်ပွါးခြင်းမရှိသေးပေမဲ့ ဒေသခံတွေအနေနဲ့ လေကြောင်းရန်ကို အထူးဂရုစိုက် နေထိုင်ကြဖို့ လိုအပ်တယ်လို့ ဆိုပါတယ်။
ဖားကန့်- ကာမိုင်းလမ်းကိုလည်း ပြီးခဲ့တဲ့ ဧပြီ ၂၂ ရက်က စစ်တပ်နဲ့ တော်လှန်းရေးပူးပေါင်းတပ်တွေအကြားမှာ တိုက်ပွဲပြင်းပြင်းထန်ထန်ဖြစ်ပွါးခဲ့တာကြောင့် ပိတ်ထားရာကနေ ပြီးခဲ့တဲ့ မေလ ၂၇ ရက်မှာ ပြန်လည်ဖွင့်လှစ်ပေးခဲ့ပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
