ပို့လဘား၊ ဇွန် ၂၁ ရက်၊ နောင်ချို
တအာင်းတပ်မတော် TNLA ထိန်းချုပ်ထားတဲ့ ရှမ်းမြောက် နောင်ချိုမြို့နယ်က လူပေါင်း ၁ ထောင်ကျော်ဟာ စစ်ဘေးရှောင်နေရတာကြောင့် အရေးပေါ် အကူအညီတွေ လိုအပ်နေတယ်လို့ စစ်ရှောင်တွေကို ကူညီပေးနေသူတစ်ဦးက ပြောပါတယ်။
နောင်ချိုမြို့ပေါ်နဲ့ ကျေးရွာတချို့က ဒေသခံတွေဟာ တိုက်ပွဲကြောင့် ကျောက်မဲမြို့ဘက်သို့ တိမ်းရှောင်လာကြတာဖြစ်ပြီး သူတို့တွေအတွက် စားနပ်ရိက္ခာနဲ့ ဆေးဝါးအကူအညီတွေ အဓိက လိုအပ်နေတာဖြစ်ပါတယ်။
“သူတို့ စားစရာကတော့ နည်းနည်းပါးပါးပေါ့။ သိတဲ့သူက နည်းနည်းထောက်ပံ့ပေးတာ ရှိတယ်။ အရင်တုန်းက ထောက်ပံ့တဲ့သူမရှိတော့ ဒုက္ခရောက်ကြတာပေါ့။ နေစရာနေရာကလည်း ဘုန်းကြီးကျောင်းက မကျွေးနိုင်တဲ့အချိန်ဆို ကိုယ့်စရိတ်နဲ့ ကိုယ်စားပေါ့။ လှူတာလည်း ဘာမှသိပ်မရှိပါဘူး။ တချို့သူတွေကလည်း အလှူခံပြီး နည်းနည်းရတာပေါ့။ ဒါပေမဲ့ အခုက လူတွေလည်း အဲလောက်ထိမလှူနိုင်တော့ဘူးလေ”ဆိုပြီး စစ်ရှောင်တွေကို ကူညီပေးနေသူတစ်ဦးက ပြောပါတယ်။
အဲဒီစစ်ရှောင်တွေဟာ စစ်ကောင်စီတပ်ရဲ့ လက်နက်ကြီး ပစ်ခတ်မှုတွေကြောင့် ပြီးခဲ့တဲ့ ဧပြီလ ၂၉ ရက်မှာ ကျောက်မဲမြို့ပေါ်က တိလင်ပရိတ္တိစာသင်တိုက်၊ အဝေရာပါသကျောင်း၊ နောင်ပိန်၊ ထန်းတပင်ကျေးရွာနဲ့ လုပ်ပါဟကျေးရွာတွေဘက်ကို တိမ်းရှောင်ခဲ့ကြတာဖြစ်ပါတယ်။
သူတို့တွေဟာ နောင်ချိုမြို့နယ် ကံကြီးကျေးရွာ၊ နောင်လင်ရွာ၊ သရက်ကုန်း၊ ရေဖြူ၊ လောက်ဖန်း၊ ညောင်ပင်သာ၊ မဲပုတ်၊ နောင်ချိုကြီး၊ ရေမောင်းတန်း၊ ညောင်နီ၊ သုံးဆယ်၊ တောင်ရှည်၊ မျက်ချီးနု၊ သပြေရေ၊ နားရှိုး၊ ရွှေမုဠော၊ မန်မော်၊ အင်းဖို၊ တောင်လှ၊ တောင်ခမ်း၊ လက်ပံကုန်း၊ လွယ်ခေါ်၊ ပိန္နဲကုန်း၊ နောင်အော၊ ညဏ်တော၊ လုံခံ၊ နမ့်ဆောင်ဟူးနဲ့ ပါဟတ် စတဲ့ကျေးရွာက ဒေသခံတွေနဲ့ နောင်ချိုမြို့ပေါ်က ဒေသခံတွေဖြစ်ကြောင်း TNLA ရဲ့ ထုတ်ပြန်ချက်အရ သိရပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
