မိုင်းရူပ၊ ဖေဖော်ဝါရီ ၁၆ ရက်၊ နောင်ချို
တရုတ်ရဲ့ စီစဥ်ပေးမှုနဲ့ တရုတ်နိုင်ငံ ယူနန်ပြည်နယ် ကူမင်းမြို့မှာ စစ်ကောင်စီနဲ့ တအာင်းတပ်မတော်- PSLF/TNLA တို့ ဆွေးနွေးနေချိန် နောင်ချိုမြို့နယ်မှာ နှစ်ဖက်တပ်အကြား တိုက်ပွဲ ပြင်းထန်နေတယ်လို့ ရှေ့တန်း စစ်မြေပြင်မှာ ရှိနေသူတွေက ပြောပါတယ်။
စစ်တပ်က ထိုးစစ်ဆင် တိုက်ခိုက်နေတာကြောင့် ဒီနေ့ ဖေဖော်ဝါရီ ၁၆ ရက်မှာ စစ်ကောင်စီရဲ့ အမြှောက်တပ်တွေ တည်ရှိရာ တောင်းခမ်းရွာအနီး နားရှိုးရွာမှာ တိုက်ပွဲ ပြင်းထန်နေတယ်လို့ ဆိုပါတယ်။
“စစ်ကောင်စီ ထိုးလာနေတာ။ တိုက်ပွဲက နေ့တိုင်းလိုလို ပြင်းထန်နေတယ်။ ဒီနေ့ နားရှိုးမှာ ဖြစ်တာ။ လေယာဥ်နဲ့လည်း လာကြဲနေတယ်” လို့ ရှေ့တန်း စစ်မြေပြင်မှာ ရှိနေသူတစ်ဦးက ရွှေဖီမြေကို ပြောပါတယ်။
မနေ့ ဖေဖော်ဝါရီ ၁၅ ရက်မှာလည်း စစ်တပ်ဟာ တောင်းခမ်းရွာအနီးတစ်ဝိုက် တစ်နေကုန်နီးပါး Y-12 လေယာဥ်နဲ့ ဗုံးကြဲတိုက်ခိုက်ခဲ့တယ်လို့ သူက ဆက်ပြောပါတယ်။
ဒီနေ့ ဖေဖော်ဝါရီ ၁၆ ရက်မှာ တရုတ်ရဲ့ ကြားဝင်စေ့စပ်မှုကြောင့် စစ်ကောင်စီနဲ့ TNLA တို့အကြား ဆွေးနွေးပွဲ ပြုလုပ်နေတာလည်း ဖြစ်ပါတယ်။
PSLF/TNLA ရဲ့ အထွေထွေ အတွင်းရေးမှူး ဗိုလ်ချုပ် တားဘုန်းကျော်ကလည်း ကိုးကန့်တပ်မတော်- MNDAA နဲ့ သဘောတူညီမှု ရရှိထားတဲ့ စစ်ကောင်စီက အပေါ်စီးကနေ ဆွေးနွေးမယ့်သဘောဆောင်ပြီး တောင်းခမ်းရွာ၊ မန္တလေးတိုင်း သပိတ်ကျင်းမြို့နယ်မှာ ထိုးစစ်တွေ ပိုလုပ်လာပြီး လေကြောင်း ပိုမိုအသုံးပြုကာ တိုက်ခိုက်နေတယ်လို့ ၎င်းရဲ့ လူမှုကွန်ရက်စာမျက်နှာမှာ ရေးသားထားပါတယ်။
စစ်တပ်က TNLA ထိန်းချုပ်ထားတဲ့ နောင်ချိုမြို့နယ်ကို လက်နက်ကြီးနဲ့ လေကြောင်းကနေ ဗုံး ၁၇၅ လုံး ပစ်ခတ်တိုက်ခိုက်ခဲ့တယ်လို့ မနေ့ ဖေဖော်ဝါရီ ၁၅ ရက်မှာ TNLA က ထုတ်ပြန်ထားပါတယ်။
