မိုင်းရူပ၊ မတ်လ ၃၁ ရက်၊ နောင်ချို
ငလျင်ဘေးသင့်တဲ့ လူထုတွေကို နိုင်ငံတစ်ဝန်းက ကူညီကယ်ဆယ်ဖို့ ကြိုးစားနေချိန် စစ်ကောင်စီတပ်က ရှမ်းမြောက် နောင်ချိုမြို့နယ် ကျောက်ကြမ်းရွာကို ဒရုန်းအသုံးပြုပြီး ဗုံးကြဲတိုက်ခိုက်ခဲ့တယ်လို့ တအာင်းတပ်မတော်- TNLA က သတင်းထုတ်ပြန်လာပါတယ်။
ဒီနေ့ မတ်လ ၃၁ ရက် မနက် ၁၀ နာရီ ၁၀ မိနစ်မှာ စစ်တပ်က TNLA ထိန်းချုပ်ထားတဲ့ ကျောက်ကြမ်းရွာကို ဒရုန်း အသုံးပြုပြီး ၁၂၀ မမ ဗုံးသီးနဲ့ တိုက်ခိုက်ခဲ့တယ်လို့ ဆိုပါတယ်။
ဗုံးကြဲတိုက်ခိုက်မှုကြောင့် အဆောက်အဦးတချို့ ထိခိုက်ပျက်စီးခဲ့ပြီး လူထိခိုက်သေဆုံးမှုတော့ မရှိဘူးလို့ နောင်ချိုဒေသခံတစ်ဦးက ရွှေဖီမြေကို ပြောပါတယ်။
“၁၀ နာရီလောက်မှာ ဒရုန်းနဲ့ လာကြဲတာဟုတ်တယ်။ ကျောက်ကြမ်းကျေးရွာထဲမှာ ကျတာ။ လူထိခိုက်တာတော့ မရှိဘူး”
ငလျင်လှုပ်ခတ်မှု ဖြစ်ပွားပြီးနောက် နောင်ချိုမြို့နယ် တောင်းခမ်းနဲ့ အုမ္မတီးရွာဘက်မှာ မြေပြင်တိုက်ပွဲ ငြိမ်နေပေမဲ့ စစ်တပ်ဘက်က ဒရုန်းနဲ့ လက်နက်ကြီးတွေ အသုံးပြုပြီး ပစ်ခတ်တိုက်ခိုက်တာ ဆက်လုပ်နေတယ်လို့ ရှေ့တန်း သတင်းအရင်းအမြစ်တွေက ပြောပါတယ်။
စစ်တပ်ဟာ နိုင်ငံတစ်ဝန်းမှာ ငလျင်ကြောင့် လူထုတွေ စိတ်သောက ရောက်နေချိန် လက်လွှတ်ထားရတဲ့ နယ်မြေတွေကို ဒရုန်းနဲ့ ဗုံးကြဲတိုက်ခိုက်မှုအပါအဝင် လေကြောင်းနဲ့ ဗုံးကြဲတိုက်ခိုက်မှု နေ့စဥ်လိုလို ပြုလုပ်နေပါတယ်။
ပြီးခဲ့တဲ့ မတ်လ ၂၈ ရက် နေ့လယ်ကလည်း ငလျင် လှုပ်ခတ်နေချိန်အတွင်း နောင်ချိုမြို့နယ် နောင်လင်ရွာထဲ စစ်တပ်က ဂျက်ဖိုက်တာ ၃ စီးနဲ့ ဗုံးကြဲတိုက်ခိုက်ခဲ့လို့ ဓနုတပ်- DPLA ရဲ့ စစ်မေ ၆ ဦးနဲ့ တပ်သား ၁ ဦး ကျဆုံးခဲ့ပါတယ်။
ဒါ့အပြင် ဒီနေ့ မတ်လ ၃၁ ရက် မနက်ပိုင်းမှာလည်း မကွေးတိုင်း စလင်းမြို့နယ်ထဲ စစ်တပ်က လေကြောင်းနဲ့ ဗုံး ၅ ကြိမ် ကြဲချတိုက်ခိုက်ခဲ့သလို ကချင်ပြည်နယ် ဗန်းမော်မြို့နယ်မှာလည်း လေကြောင်း တိုက်ခိုက်မှုတွေ ဆက်တိုက် လုပ်ဆောင်နေပါတယ်။
