စက်တင်ဘာ ၂၉ ရက်၊ ကျောက်မဲ
စစ်ကောင်စီတပ်က ကျောက်မဲမြို့ဘက်ကို ထိုးစစ်ဆင်နေချိန် တအာင်းတပ် – PSLF/TNLA ထိန်းချုပ်ထားတဲ့ ကျောက်မဲမြို့အနီးမှာရှိနေတဲ့ မိုင်းတင်းကျေးရွာထဲမှာ ရှမ်းပြည်တိုးတက်ရေးပါတီ – SSPP က ရွာခံတွေကိုအစည်းအဝေးခေါ်ပြီးနောက် ရွာထဲရှိ TNLA ကို ကျေးရွာထဲမနေဖို့ ရွာခံတွေ ဆန္ဒပြခဲ့ကြတယ်လို့ စုံစမ်းသိရပါတယ်။
ဖြစ်စဉ်ဟာ ပြီးခဲ့တဲ့ စက်တင်ဘာ ၂၇ရက်နေ့ မနက်ပိုင်းက မိုင်းတင်းကျေးရွာထဲမှာ SSPP ကရွာခံတွေကို အစည်းအဝေးခေါ်ပြီး မိုင်းတင်းရွာအဝင်အထွက်ကို ပိတ်ဆို့ခဲ့ပါတယ်။
အဲဒီအစည်းအဝေးပြုလုပ်ပြီး နောက်တစ်နေ့ စက်တင်ဘာ ၂၈ ရက် နေ့လည်ပိုင်း အချိန်ကစပြီး မိုင်းတင်းရွာခံ ၆၀ ဝန်းကျင်ဟာ TNLA ကို ကျေးရွာအနီး ဂိတ်မချဖို့ ဆန္ဒပြခဲ့ကြတယ်လို့ TNLA နဲ့ နီးစပ်တဲ့ သတင်းရက်းမြစ်ဆီကနေ သိရပါတယ်။
“SSPP စစ်သားတွေနဲ့ ပြည်သူလူထု အယောက် ၆၀ လောက်က ပိန်းခါးဂိတ်ကို ဖျက်ဆီးပစ်လိုက်တာ။ TNLA ကို ရွာထဲမနေရဘူးဆိုပြီးတော့ ဂိတ်ဖျက်ဆီးပစ်လိုက်တယ်။ TNLA ထွက်မသွားသေးတော့ SSPP ဖက်က စစ်အင်အားဖြည့်ပြီးတော့ TNLA ကို ဝိုင်းလိုက်တယ်။ အထက်လူကြီးက ပြည်သူလူထုတွေလည်း ပါတယ်ဆိုပြီးတော့ ပိန်းခါးစခန်းကနေ ထွက်ခွာခိုင်းတာ”
မနေ့ စက်တင်ဘာ နေ့လည် ၁၁ နာရီအချိန်မှာ အထက်လူကြီး အမိန့်ပေးမှုနဲ့ TNLA က စခန်းကနေ ပြန်လည်ထွက်ခွာသွားခဲ့ရတယ်လို့ နီးစပ်သူဆီကနေ သိရပါတယ်။
“ကျနော်တို့ဖက်က သူတို့နဲ့ တွေ့ဆုံဖို့ ဆွေးနွေးဖို့ပေါ့ ပြောတယ်။ အဲဒါကိုတော့ သူတို့ဘက်က ဘယ်လိုမှ လက်မခံခဲ့ဘူး”လို့ ဆိုပါတယ်။
TNLA ဂိတ်ကို ဖျက်ဆီးလိုက်တာဟာ စစ်ကောင်စီရဲ့ လေကြောင်းရန်ကနေ လွတ်ဖို့ဖြစ်တယ်လို့ ဆန္ဒပြပွဲမှာ ပါဝင်သူအချို့က ပြောပါတယ်။
ကျောက်မဲနယ်အပြင် TNLA ထိန်းချုပ်ထားတဲ့ မိုင်းငေါ့ မြို့ဘက်ကိုလည်း SSPP တပ်က ဝမ်ဟိုင်းကနေ အင်အားဖြည့်တင်းလျက်ရှိနေပြီး TNLA အပါ ပြည်သူတွေရဲ့ သွားလာမှုတွေကို တင်းကြပ်ကန့်သတ်လာတာမျိုးတွေရှိနေတယ်လို့ TNLA နဲ့ နီးစပ်တဲ့ သတင်းရင်းမြစ်တွေဆီကနေ သိရပါတယ်။
မြေပြင်က ရရှိတဲ့သတင်းအချက်အလက်ကို အတည်ပြုနိုင်ဖို့ ရှမ်းပြည်တိုးတက်ရေးပါတီ – SSPP/SSA ရဲ့ ပြောရေးဆိုခွင့်ရှိသူ ဗိုလ်မှူးကြီး စိုင်းဆုကို ရွှေဖီမြေအနေနဲ့ ဆက်သွယ်ခဲ့ပေမဲ့ စက်ပိတ်ထားပြီး ဗိုလ်မှူးကြီး နော်လိတ်ကို ဆက်သွယ်ရာမှာ အခမ်းအနားပြုလုပ်နေတာကြောင့် ရွှေဖီမြေကို ပြန်လည်ဆက်သွယ်မယ်လို့ ပြောဆိုထားပါတယ်။
လက်ရှိ စစ်ကောင်စီတပ်ဟာ ကျောက်မဲမြို့အနီးကို ရောက်ရှိလာပြီး တိုက်ပွဲတွေဆက်ဖြစ်နေသလို ကျောက်မဲမြို့ထဲကို ဝင်ရောက်ဖို့ စစ်ကြောင်း ၂ကြောင်းခွဲပြီး စစ်ကောင်စီဘက်က ထိုးစစ်ဆင်နေတယ်လို့ မြေပြင်သတင်းအရင်းမြစ်တွေက ပြောပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှု နားဆင်နိုင်ပါတယ်။
