ပို့လဘား၊ ဇူလိုင် ၂၄ ရက်၊ မူဆယ်
စစ်ကောင်စီတပ်ထိန်းချုပ်ထားတဲ့ တရုတ်-မြန်မာနယ်စပ် မူဆယ်မြို့မှာ အမျိုးသမီးနှစ်ဦး သေနတ်နဲ့ ပစ်သတ်ခံရပြီး သေဆုံးသွားတယ်လို့ မူဆယ်မြို့ခံအမျိုးသားတစ်ဦးက ရွှေဖီမြေကို ပြောပါတယ်။
ဒီနေ့ ဇူလိုင်လ ၂၄ ရက် နေ့လည် ၃ နာရီဝန်းကျင်မှာ မူဆယ်မြို့က မီးသတ်ရုံးအနားမှာ အမည်မသိအမျိုးသား ၂ဦးက အမျိုးသမီးနှစ်ဦးကို သေနတ်နဲ့ ပစ်သတ်ခဲ့တာ ဖြစ်ပါတယ်။
“အဲဒီမိန်းကလေးနှစ်ယောက်က ကားစီးလာတာ။ သူတို့နှစ်ယောက်ကို ဓားပြတိုက်တာလည်း မဟုတ်လောက်ဘူး။ အဲနေရာက လူစည်တဲ့နေရာ ရည်ရွယ်ချက်ရှိရှိနဲ့ ပစ်သွားတာ ထင်တာပဲ။ လာပစ်တဲ့ နှစ်ယောက်ကိုတော့ မမိသေးဘူး” လို့ ပြောပါတယ်။
စစ်ကောင်စီတပ် ထိန်းချုပ်ထားတဲ့ မူဆယ်မြို့မှာ လူသတ်မှု၊ ဓားပြတိုက်မှု၊ လုယက်မှုနဲ့ ခိုးမှု စတဲ့ဒုစရိုက်မှုတွေ မကြာခဏဖြစ်ပွားနေပြီး စစ်ကောင်စီဘက်က အရေးယူနိုင်တာ မရှိပါဘူး။
ပြီးခဲ့တဲ့ ဇူလိုင် ၁၅ ရက်ကလည်း မူဆယ်မြို့ ကောင်းမှုလွယ်ရပ်ကွက်မှာ မြို့မပြည်သူ့စစ်အဖွဲ့ (၃) တပ်ဖွဲ့ဝင် တစ်ဦးက ကားနဲ့ သွားလာနေစဉ် ပစ်သတ်ခံခဲ့ရတယ်လို့ သိရပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
