ပို့လဘား၊ မေလ ၂၄ ရက်၊ မူဆယ်
တရုတ်-မြန်မာနယ်စပ်ဖြစ်တဲ့ ရှမ်းမြောက် မူဆယ်မြို့ ဈေးရပ်ကွက်ရှိ ရွှေဆိုင်တစ်ဆိုင်ကို ပြီးခဲ့တဲ့မေလ ၂၁ ရက်နေ့မှာ အမည်မသိအမျိုးသား ၅ ဦးက ဓားပြတိုက်သွားခဲ့တယ်လို့ ဒေသခံတွေက ပြောပါတယ်။
အဆိုပါ ဓားပြတိုက်သွားတဲ့ အမျိုးသား ၅ ထဲက ၂ ဦးကိုတော့ ပြီးခဲ့တဲ့ မေလ ၂၂ ရက်က ဖမ်းဆီးခဲ့မိပြီး ၃ ဦးက ထွက်ပြေးလွတ်မြောက်နေဆဲဖြစ်တယ်လို့ မူဆယ်မြို့ခံအမျိုးသမီးတစ်ဦး ပြောပြချက်အရ သိရပါတယ်။
မူဆယ်မြို့ခံ အမျိုးသမီးတစ်ဦးက “၂ ယောက်တော့ ဖမ်းမိတယ်။ သူတို့ ဓားပြတိုက်ပြီး နောက်တစ်ရက်မှာ ဖမ်းမိတာ။ သူတို့ယူသွားတဲ့ ရွှေတချို့ ပြန်ရတယ်။ သူတို့နှစ်ယောက်ရဲ့ ပစ္စတိုသေနတ်နဲ့လည်း ယူထားတယ်။ သူတို့က ပြည်သူ့စစ်လို့ပြောကြတယ်”လို့ ပြောပါတယ်။
ဖမ်းဆီးထားတဲ့အမျိုးသား၂ ဦးထံ အမှတ်၁၄ စစ်ဆင်ရေးကွပ်ကဲစစ်ဌာနချုပ် လက်အောက်က ထုတ်ပေးထားတဲ့ကတ်ပြား၊ ပစ္စတိုတစ်လက်နဲ့ ရွှေ တချို့ကိုလည်း သိမ်းဆည်းရခဲ့တယ်လို့ ဆိုပါတယ်။
ပြီးခဲ့တဲ့ မေလ ၁၉ ရက်ကလည်း မူဆယ်မြို့မှာ ကင်းစောင့်နေတဲ့ ရဲတပ်သားတစ်ဦးကို အမျိုးသားတစ်ဦးက ၎င်းရဲ့ ဆိုင်ကယ်၊ ဖုန်းနဲ့ ငွေတွေ လုယက်သွားခဲ့တယ်လို့ သိရပါတယ်။
စစ်ကောင်စီတပ် ထိန်းချုပ်ထားတဲ့ မူဆယ်မြို့မှာ မူးယစ်ဆေးဝါးရောင်းဝယ်သုံးစွဲသူနဲ့ လောင်းကစားဝိုင်းဟာ အရင်ကထက် ပိုများလာပြီး နေ့စဉ်လိုလို ခိုးမှု၊ လုယက်မှု၊ ဓားပြတိုက်မှုနဲ့ ပြန်ပေးဆွဲမှုတွေ ဖြစ်ပွားနေပေမဲ့ တရားခံတွေကို ဖမ်းဆီးနိုင်တာ မရှိသလို အမှုတိုင်းမှာလည်း အများစုက လက်နက်ကိုင်ဆောင်ထားကြသူတွေ ဖြစ်နေတယ်လို့ အဆိုပါအမျိုးသမီးက ပြောပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
