ပို့လဘား၊ မတ်လ ၇ ရက်၊ မူဆယ်
ရှမ်းမြောက် တရုတ်-မြန်မာ နယ်စပ်ဖြစ်တဲ့ မူဆယ်မြို့ လမ်းမပေါ်မှာ သေနတ်ကိုင်ထားတဲ့ အမျိုးသားနှစ်ဦးက ဆိုင်ကယ်နဲ့ ဖုန်းလုယက်မှု ဖြစ်ပွားခဲ့တယ်လို့ မူဆယ်မြို့ခံတစ်ဦးက ရွှေဖီမြေကို ပြောပါတယ်။
ဒီနေ့ မတ်လ ၇ ရက် မနက် ၇ နာရီဝန်းကျင်မှာ မူဆယ်မြို့ တော်ရွက်ရပ်ကွက်မှာ မောင်နှမဖြစ်သူ နှစ်ယောက်က အလုပ်ကနေ ပြန်လာနေစဉ် ဆိုင်ကယ်နဲ့ ဖုန်း လုခံခဲ့ရတာ ဖြစ်ပါတယ်။
“ဒီမနက် သူ့မောင်လေးက သူ့အမလုပ်တဲ့ ရုံးမှာ သွားကြိုတာပေါ့။ ယောကျာ်းလေးနှစ်ယောက်က သေနတ်ထောက်ပြီး သူတို့မောင်နှမ နှစ်ယောက်ဆီ ဆိုင်ကယ်နဲ့ ဖုန်းယူသွားတယ်။ သူတို့နှစ်ယောက်အော်လို့ လူလာကြည့်တော့ သူတို့နှစ်ယောက်ထွက်ပြေးသွားတယ်။ ဆိုင်ကယ်နဲ့ ဖုန်းတော့ပါသွားတယ်။ နောက်ကနေ လိုက်သေးတယ်။ မမှီလိုက်ဘူး”
မူဆယ်မြို့ တရားဥပဒေစိုးမိုးရေး အားနည်းနေတာကြောင့် လုယက်မှု ဖြစ်ပွားတာဟာ ကိစ္စအသေးအမွှားလောက်ပဲရှိတယ်လို့ အဆိုပါအမျိုးသားက ပြောပါတယ်။
ပြီးခဲ့တဲ့ ဖေဖော်ဝါရီ ၂၅ ရက်ကလည်း မူဆယ်မြို့ ပြည်ထောင်စုလမ်းမပေါ်ရှိ ရွှေရာစု ဟိုတယ်အရှေ့ လူမြင်ကွင်း လမ်းမပေါ်မှာလည်း လုယက်မှုဖြစ်ပွားခဲ့ပါတယ်။
စစ်တပ်အာဏာသိမ်းပြီးနောက်မှာ မူဆယ်မြို့ မူးယစ်ဆေးဝါးရောင်းဝယ်သုံးစွဲသူနဲ့ လောင်းကစားဝိုင်းတွေ ပိုများလာတာဖြစ်ပြီး ခိုးမှု၊ လုယက်မှုနဲ့ ဓားပြတိုက်မှုလည်း မကြာခဏ ဖြစ်ပွားနေတဲ့ မြို့လည်း ဖြစ်ပါတယ်။
