ယာရူစိင်၊ မတ်လ ၁၁ ရက်၊ တာချီလိတ်
စစ်ကောင်စီတပ် ထိန်းချုပ်ထားတဲ့ ရှမ်းအရှေ့ တာချီလိတ်မြို့မှာ အမျိုးသမီး ၁ ဦးကို အမျိုးသား ၂ ဦးက နေအိမ်အထိ လာရောက်ပြီး ပြန်ပေးဆွဲသွားခဲ့တယ်လို့ ရွှေဖီမြေက စုံစမ်းသိရှိရပါတယ်။
မနေ့ မတ်လ ၁၀ ရက် ည ၉ နာရီဝန်းကျင်အချိန်မှာ Crown ကားအဖြူရောင် မောင်းတဲ့ အမျိုးသား ၂ ဦးဟာ တာချီလိတ်မြို့နယ် မယ်ယန်းရွာမှာ နေထိုင်တဲ့ အသက် ၆၀ အရွယ် ဒေါ်နန်းစံရှဲန်ရဲ့ နေအိမ်အထိ လာရောက်ကာ ပြန်ပေးဆွဲခဲ့တာလို့ မြေပြင်အခြေအနေ သိရှိသူတစ်ဦးက ရွှေဖီမြေကို ပြောပါတယ်။
“ကားကို အမြန်မောင်းတာတော့ တွေ့တယ်ပေါ့။ ပြီးတော့မှ ပြန်ပေးဆွဲသွားတာ သိရတယ်။ ဘာကြောင့် ပြန်ပေးဆွဲခံရလဲတော့ မသိဘူး။ ပြန်ပေးဆွဲတာကျ တာချီလိတ်မှာက မကြာခဏ ဖြစ်တတ်တယ်။ ပြန်ပေးဆွဲခံရတဲ့သူရဲ့ သတင်းလည်း ဘာမှမကြားရဘူး ပျောက်သွားတယ်။ မသိရင် ဘာအမှုမှ မရှိသလိုဘဲ”
တာချီလိတ်မြို့မှာ တရားဥပဒေ စိုးမိုးရေး အားနည်းနေတာကြောင့် ပြန်ပေးဆွဲမှု ဖြစ်ပွားနေတာဟာ ကိစ္စအသေးအမွှားသာ ဖြစ်နေတယ်လို့ အထက်ပါ သတင်းအရင်းအမြစ်က ဆက်ပြောပါတယ်။
နောက်ထပ် မြေပြင်အခြေအနေ သိရှိသူ တစ်ဦးက “တာချီလိတ်မှာ တရားဥပဒေလုပ်ဆောင်ချက်ဆိုတာ မရှိတော့သလိုဘဲ။ ဘာအမှုဘဲဖြစ်ဖြစ် အဲအမှုရဲ့ နောက်ဆက်တွဲကိုလည်း မသိရတော့ဘူး။ ဒီအတိုင်းလေး ဘာမှမဖြစ်ခဲ့သလိုမျိုးပေါ့။ လုယက်မှု ဓားပြတိုက်မှုအပြင် ပြန်ပေးဆွဲမှုတွေလဲ ဖြစ်နေကြဘဲလေ။ ဘာအမှုမှ ပေါ်ခဲ့တာမှ မဟုတ်တာ” လို့ ပြောပါတယ်။
ဒါ့အပြင် မနေ့ မတ်လ ၁၀ ရက် တစ်ရက်အတွင်း ပြန်ပေးဆွဲမှုအပြင် လုယက်မှုလည်း ဖြစ်ပွားခဲ့ကြောင်း ဒေသခံတွေရဲ့ ပြောပြချက်အရ သိရပါတယ်။
ရှမ်းအရှေ့ ကျိုင်းတုံနဲ့ တာချီလိတ်မြို့မှာ တစ်ပတ်အတွင်း လုယက်မှု၊ ခိုးမှုနဲ့ ပြန်ပေးဆွဲမှု ၇ ကြိမ်ထက်မနည်း ဖြစ်ပွားခဲ့ပါတယ်။
