လွေးလာဝ်ဇာရ်၊ မတ်လ ၃၁ ရက်၊ ကျောက်မဲ
ရှမ်းမြောက် ကျောက်မဲမြို့နယ် မိုင်းတင်းကျေးရွာအုပ်စု မန်စန်းရွာမှာ မီးလောင်မှုဖြစ်ပွားပြီး နေအိမ် ၂ လုံး မီးလောင်ဆုံးရှုံးခဲ့တယ်လို့ သိရပါတယ်။
ဒီနေ့ မတ်လ ၃၁ ရက် မနက် ၁၀ နာရီဝန်းကျင်မှာ မီးလောင်ခဲ့တာဖြစ်ပြီး အဲဒီမီးလောင်မှုမှာ လူထိခိုက်တာတော့ မရှိဘူးလို့ အမျိုးသားတစ်ဦးက ရွှေဖီမြေကို ပြောပါတယ်။
ဖြစ်စဉ်သိရှိသူ အမျိုးသားတစ်ဦးက “ဒီနေ့ မနက်ပိုင်းမှာ ဖြစ်တာ။ ဝန်းတစ်ခုထဲကိုမှ နေအိမ်တစ်လုံးနဲ့ သူတို့ ကောက်ရိုးထားတဲ့ အိမ်တစ်ခုက သူတို့ စက်တွေဘာတွေ ထားတာ။ အဲနှစ်လုံး မီးလောင်သွားတာ။ အဲမှာ အိမ်တိုင်းအိမ်တိုင်းက အဲလိုမျိုးအိမ် ရှိကြတယ်” လို့ ပြောပါတယ်။
အဲဒီမီးလောင်မှုမှာ ဒေသခံတွေကပဲ ဝိုင်းဝန်းကာ မီးငြိမ်းသတ်ပေးခဲ့တာဖြစ်ပြီး ပျက်စီးဆုံးရှုံးသွားတဲ့ ပစ္စည်းတန်ဖိုးတွေကိုတော့ မသိရသေးဘူးလို့ အထက်ပါ အမျိုးသားက ဆက်ပြောပါတယ်။
ပြီးခဲ့တဲ့ မတ်လ ၁၀ ရက်မှာ နမ့်ခမ်းမြို့နယ် ဖပြန်(ဖဖဲန်)ရွာမှာလည်း ဘတ္ထရီအိုးပေါက်လို့ နေအိမ်တစ်လုံး မီးလောင်ပြာကျခဲ့သလို မတ်လ ၁၃ ရက်ကလည်း ကျောက်မဲမြို့နယ်က သီလရှင်ကျောင်းတစ်ကျောင်း မီးလောင်ခဲ့ပါတယ်။
ရွှေဖီမြေက ပြုစုထားတဲ့ စာရင်းအရ မတ်လ တစ်လအတွင်း မီးလောင်မှု ၃ ကြိမ် ဖြစ်ပွားခဲ့ပါတယ်။
