လွေးထွေး၊ ဧပြီ ၂၇ ရက်၊ ပြင်ဦးလွင်
မန္တလေးတိုင်း ပြင်ဦးလွင်မြို့က စစ်ကောင်စီတပ်ရဲ့ စစ်ဆေးရေးဂိတ်တစ်ခုမှာ ဖြတ်သန်းသွားလာတဲ့ ကုန်ကားတွေက တိုင်းရင်းသားလက်နက်ကိုင်တွေကို အခွန်ဆောင်တယ်ဆိုတဲ့ စွပ်စွဲချက်နဲ့ ဖမ်းဆီး စစ်ဆေးနေတယ်လို့ ဖြစ်စဉ်ကိုသိရှိသူ ကားသမားတစ်ဦးရဲ့ပြောပြချက်အရ သိရပါတယ်။
ပြီးခဲ့တဲ့ ဧပြီ ၂၁ ရက် ဝန်းကျင်ကစပြီး မနေ့ ဧပြီ ၂၆ ရက်အထိ ၎င်းဂိတ်မှာ စစ်ဆေးမှုပြုလုပ်နေကြတဲ့ တပ်သားတွေက ကားပေါ်က အခွန်စာရွက်တွေ ရှာဖွေကြည့်တဲ့အချိန် တအာင်းတပ် TNLA နဲ့ ရှမ်းပြည်တိုးတက်ရေးပါတီ SSPP တို့ကို အခွန်ဆောင်ထားတဲ့ စာရွက်တွေ့ခဲ့တာကြောင့် အကြမ်းဖက်အားပေးထောက်ခံမှုနဲ့ ကားသမားရော ကားကိုပါ ၃ ည ပြင်ဦးလွင်မှာ ဖမ်းဆီးချုပ်နှောင်ထားခဲ့တာ ဖြစ်ပါတယ်။
ဖြစ်စဉ်ကိုသိရသူ ကားသမားတစ်ဦးက “အဲကားသမားကိုဖမ်းတာက တောအဖွဲ့တွေကို ငွေပေးလို့တဲ့။ သေချာတာတစ်ခုက ကျနော်တို့ကားသမားတွေက ဘယ်အဖွဲ့ကိုမဆို ငွေတောင်းရင် ပေးရမှာဘဲလေ။ အဲလိုမှမဟုတ်ရင် သွားဖို့လာဖို့ကမှ မလွယ်တာ။ ဒါကတော့ရှင်းရှင်းလေးဘဲ။ အခုဖမ်းနေတာကလည်း စစ်တပ်တွေက တမင်ငွေညစ်ချင်လို့ပါဘဲ။ ရိုက်နှက်တာတော့မရှိဘူး။ ဒီတိုင်းဘဲ ညှိပြီးမှ ပြန်လွှတ်လာပြီ” လို့ ရွှေဖီမြေသို့ ပြောပါတယ်။
ဒါ့အပြင် နောင်ချိုနဲ့ မန္တလေးကြားမှာ စစ်ကောင်စီက ဂိတ် ၈ ခု ထက်မနည်း ဖွင့်ထားပြီး နေရာတချို့မှာ စစ်ဆေးတင်းကြပ်နေသလို ငွေ ၃ သိန်းအထိ တောင်းခံနေတာလည်း ရှိနေတာကြောင့် ကားသမားတွေ အခက်ကြုံနေကြရပါတယ်။
နောက်ထပ် ကားသမားတစ်ဦးက “ငွေလမ်းခင်းပြီးသွားနေရတာပါ။ ကျနော်တို့ စားဝတ်နေရေးတွေအတွက်ပေါ့။ လမ်းမှာလည်း ဗမာစစ်သားတွေက မထင်ရင်မထင်သလို စစ်တာ၊ ဖမ်းတာတွေရှိတော့ အသက်ရင်းပြီး ကားမောင်းနေရတယ်။ စစ်ဆေးဖမ်းဆီးတာ မရှိဘဲ အရင်လိုဘဲ ချောချောမွေ့မွေ့ ပြန်သွားလာချင်ပြီ” လို့ ပြောပါတယ်။
ပြီးခဲ့တဲ့ ဇန်နဝါရီလနဲ့ မတ်လအတွင်းကလည်း စစ်ကောင်စီတပ်နဲ့ တော်လှန်ရေးတပ်တွေရှိတဲ့ မန္တလေးနဲ့ နောင်ချိုကြားက ဖြတ်သန်းသွားလာတဲ့ လူထုတွေ မကြာခန ပျောက်ဆုံးနေပြီး ရွှေဖီမြေက ရရှိထားတဲ့စာရင်းအရ ကားသမား ၄ ဦးနဲ့ ဆိုင်ကယ်စီးလာတဲ့ အမျိုးသား ၃ ဦး ပျောက်ဆုံးခဲ့ဖူးပါတယ်။
အလားတူ ပြီးခဲ့တဲ့ ဧပြီ ၂၂ ရက်က လားရှိုးမြို့သို့ စစ်ကောင်စီတပ်က ပြန်လည်ဝင်ရောက်လာပြီးနောက် ၂၃ ရက်ကစပြီး လားရှိုး-သိန္နီအထွက် လုံခြုံရေးတာဝန်ယူထားတဲ့ စစ်ကောင်စီတပ်တွေက ဖြတ်သန်းသွားလာတဲ့ ကုန်ကားနဲ့ အိမ်စီးကားတွေကို ငွေကျပ် ၃ သောင်းကနေ ၁၀ သိန်းအထိ တောင်းခံခဲ့ပါတယ်။
