မိုင်းရူပ၊ မတ်လ ၁၀ ရက်၊ ကျောက်မဲ
တအာင်းတပ်မတော် PSLF/TNLA ထိန်းချုပ်ထားတဲ့ ရှမ်းမြောက် ကျောက်မဲမြို့မှာ မူးယစ်ဆေးဝါး ရောင်းဝယ်သူ ၄ ဦးနဲ့ သိန်းတစ်သောင်းခွဲဝန်းကျင် တန်ဖိုးရှိတဲ့ မူးယစ်ဆေးဝါးတွေကို ဖမ်းဆီးရမိခဲ့တယ်လို့ တအာင်းတပ်က ဒီနေ့ မတ်လ ၁၀ ရက်မှာ ထုတ်ပြန်လာပါတယ်။
ပြီးခဲ့တဲ့ မတ်လ ၈ ရက်မှာ ကျောက်မဲ-မိုးကုတ် လမ်းမပေါ်မှာ PSLF/TNLA ရဲ့ ရဲတပ်ဖွဲ့က မီးသွေးတင်လာတဲ့ ကားတစ်စီးကို စစ်ဆေးရာမှာ ဆာလာအိတ်အဝါနဲ့ ထုတ်ထားတဲ့ မူးယစ်ဆေးဝါး အများအပြားကို ဖမ်းဆီးရမိခဲ့တာ ဖြစ်တယ်လို့ ဆိုပါတယ်။
“မူးယစ်ဆေးဝါးတွေကို မီးသွေးအိတ်ကြားမှာ တင်လာတာ။ ရဲတွေက မသင်္ကာလို့ စစ်ဆေးကြည့်တော့ မူးယစ်ဆေးဝါးတွေ ဖြစ်နေတာ။ တန်ဖိုး သိန်းတစ်သောင်းကျော်လောက် ရှိမယ်” လို့ မြေပြင်အခြေအနေသိရှိသူတစ်ဦးက ရွှေဖီမြေကို ပြောပါတယ်။
ဖမ်းဆီးရမိတဲ့ မူးယစ်ဆေးဝါးတွေထဲမှာ ယာမစိတ်ကြွဆေးပြား အထုပ်ကြီး (၁၁) ထုပ် (A တံဆိပ်)၊ အထုပ်ကြီး (၁၉၉)ထုပ် (၆၆၆ တံဆိပ်)၊ (Ice) မူးယစ်ဆေးဝါး (၂) ထုပ်၊ (K) ထုပ်ကြီး (၁) ထုပ်၊ (RC) တံဆိပ်ပါ မူးယစ်ဆေးဝါး (၃) ထုပ်၊ EriMin 5 (10) ကဒ်နဲ့ FriMin 5 (10) ကဒ်တို့ ဖြစ်ပါတယ်။
ဖမ်းဆီးရမိသူ ဦးကျော်ဇင်ထက်၊ ဦးဟိန်းမင်းလတ်၊ ဦးအေးကိုနဲ့ ဦးထက်ထက်အောင်တို့ကို TNLA က အရေးယူသွားမယ်လို့ ဆိုပါတယ်။
TNLA ထိန်းချုပ်ထားတဲ့ နမ့်ခမ်း၊ မိုးကုတ်၊ ကွတ်ခိုင်၊ ကျောက်မဲ၊ နမ့်ဆန်နဲ့ လားရှိုးမြို့နယ် မိုင်းယော်တိုက်နယ်မှာ ပြီးခဲ့တဲ့ ဖေဖော်ဝါရီလအတွင်း မူးယစ်ဆေးဝါးသုံးစွဲသူ (၈၅) ဦးနဲ့ ရောင်းဝယ်သူ (၇) ဦးကို ဖမ်းဆီးနိုင်ခဲ့တယ်လို့ တအာင်းတပ်က ထုတ်ပြန်ထားပါတယ်။
ပြီးခဲ့တဲ့ ၂၀၂၄ ခုနှစ်အတွင်း PSLF/TNLA ထိန်းချုပ်ထားတဲ့ ဒေသတွေမှာ မူးယစ်ဆေးဝါးသုံးစွဲသူ (၁,၉၂၃) ဦးကို ဖမ်းဆီးနိုင်ခဲ့တယ်လို့ TNLA က ပြီးခဲ့တဲ့ ဇန်နဝါရီ ၂၈ ရက်မှာ သတင်းထုတ်ပြန်ထားပါတယ်။
