ပို့လဘား၊ ဇန်နဝါရီ ၁၈ ရက်၊ လားရှိုး
ကိုးကန့်တပ်မတော်- MNDAA ထိန်းချုပ်ထားတဲ့ ရှမ်းမြောက် လားရှိုးမြို့က ရပ်ကွက်တချို့မှာ သူခိုးတွေ သောင်းကျန်းနေတယ်လို့ ဒေသခံတွေက ရွှေဖီမြေကို ပြောပါတယ်။
စစ်တပ် အာဏာမသိမ်းခင်ကတည်းက မူးယစ်ဆေးဝါး ရောင်းဝယ်သုံးစွဲသူ များတဲ့ လားရှိုး ရပ်ကွက်(၅)မှာ မြို့သိမ်းတိုက်ပွဲအတွင်း စစ်ရှောင်သွားကြတဲ့ ဒေသခံရဲ့ နေအိမ်တွေကို ဖောက်ထွင်းခိုးယူနေကြတာလို့ ဆိုပါတယ်။
လားရှိုးမြို့ ရပ်ကွက် ၅ မှာ နေထိုင်တဲ့ အမျိုးသမီးတစ်ဦးက “မနေ့ညလည်း အစ်ကိုရဲ့အိမ်ကို ဖောက်ပြီး ခိုးတယ်။ ရေမော်တာတွေ ခိုးသွားတယ်။ ထင်းတွေလည်း ခိုးတယ်။ ရောင်းလို့ရတဲ့ဟာတွေဆို သူတို့ အကုန်ခိုးသွားတယ်။ မီးကြိုးနဲ့ မီတာဘောက်အတွင်းထဲက ပစ္စည်းတွေလည်း အကုန်ဖြုတ်ပြီး ခိုးသွားတယ်။ နေ့ဘက်သွားစောင့်လည်း ညဘက်ဆို သွားမကြည့်ပေးနိုင်ဘူး” လို့ ပြောပါတယ်။
MNDAA ကလည်း မူးယစ်ဆေးဝါး ရောင်းဝယ်သုံးစွဲသူတွေကို ဖမ်းဆီးအရေးယူတာ ပြုလုပ်နေပေမဲ့လည်း လက်ရှိအချိန်ထိ မူးယစ်ဆေးဝါး သုံးစွဲသူတွေ ဆက်ရှိနေသေးတယ်လို့ သူမက ဆက်ပြောပါတယ်။
“သူခိုးကတော့ ရှိတော့ ရှိပါတယ်။ ဒါပေမဲ့ ဒီဘက် (MNDAA)ကလည်း ဖမ်းဆီးတာတွေ လုပ်နေပါတယ်” ဆိုပြီး လားရှိုးပြန်လည်ထူထောင်ရေးရဲ့ တာဝန်ရှိသူတစ်ဦးက ပြောပါတယ်။
ပြီးခဲ့တဲ့ ၂၀၂၄ ဇူလိုင် ၃၀ ရက်ကလည်း လားရှိုးမြို့မှာ အုပ်စုလိုက် နေအိမ်ဖောက်ထွင်းပြီး ပစ္စည်းခိုးယူနေသူ အယောက် ၃၀ ဦးကို MNDAA က ဖမ်းဆီးခဲ့ပါတယ်။
ဒါ့အပြင် လားရှိုးမြို့မှာ ၂၀၂၄ ဒီဇင်ဘာ ၁၄ ရက်မှာ MNDAA က စစ်ကောင်စီရဲ့ သတင်းပေးနဲ့ သူခိုးတွေကို ဖမ်းဆီးဖို့ ရပ်ကွက်လုံခြုံရေး ဖွဲ့စည်းခဲ့ပါတယ်။
