အင်းငယ်၊ မတ်လ ၁၄ ရက်၊ ဗန်းမော်
ကချင်ပြည်နယ် ဗန်းမော်နဲ့ မိုးညှင်းက အကျဉ်းထောင် ၂ ခုမှာ နှစ်ရှည်အကျဉ်းကျနေတဲ့ ရဲ၊ စစ်ကောင်စီတပ်သားတွေကို လက်ရှိမှာ တာဝန်ပြန်လည်ထမ်းဆောင်ဖို့ အကျဉ်းဦးစီးဌာနဝန်ထမ်းနဲ့ ထောင်အာဏာပိုင်တွေက ပြောဆိုစည်းရုံးနေတယ်လို့ ထောင်နဲ့ နီးစပ်သူတွေက ပြောပါတယ်။
တာဝန် ပြန်လည် ထမ်းဆောင်မယ့်သူတွေကို ကွင်းလုံးကျွတ် လွတ်ငြိမ်းခွင့် ပေးမယ့်အပြင် မူလရာထူး အဆောင်အယောင်တွေအတိုင်း ပြန်လည် ချီးမြှင့်မယ်လို့ မက်လုံးပေး စည်းရုံးထားတာပါ။
မြန်မာနိုင်ငံလုံးဆိုင်ရာ နိုင်ငံရေး အကျဉ်းသားများကွန်ယက်- PPNM ရဲ့ ဦးဆောင်ကော်မတီဝင် ကိုသိုက်ထွန်းဦးက “ကျနော်တို့ ထုတ်ပြန်ထားတဲ့ ထောင် ၂ ခုမှာတော့ ဒီလိုအခြေအနေတွေ ဖြစ်နေတယ်ဆိုတာ ပြောလို့ရပါတယ်။ ကျန်တဲ့ထောင်တွေ အသေးစိတ် သိရှိဖို့ကတော့ ခဲယဉ်းတဲ့အတွက် မပြောလိုပါဘူး။ ဒီအခြေနေမှာလည်း ကျနော်တို့က အချက်အလက်အပေါ် အခြေပြုပြီး ပြောတဲ့အဖွဲ့ ဖြစ်တဲ့အတွက် ရရှိထားတဲ့ အခြေအနေ အချက်အလက်ပေါ်မှာပဲ ပြောရခြင်း ဖြစ်ပါတယ်။ တခြားထောင်တွေကိုတော့ နောက်ထပ် ထုတ်ပြန်သွားဖို့ ရှိပါတယ်” လို့ ပြောပါတယ်။
ဒါ့အပြင် နှစ်ရှည်ထောင်ဒဏ်ကျ အကျဉ်းသားတွေကို လုံခြုံရေးအဖြစ် တာဝန်ထမ်းဆောင်ခိုင်းတာ၊ စစ်ကောင်စီတပ်သားနဲ့ ပူးတွဲ ခံစစ်အဖြစ် တာဝန်ချတာတွေ စေခိုင်းသွားမယ်လို့ ဆိုပါတယ်။
လက်ရှိ ဗန်းမော်မြို့အပါအဝင် အနီးတစ်ဝိုက်မှာ တိုက်ပွဲ ပြင်းထန်နေပြီး အကျဉ်းထောင်လည်း မကြာခင်မှာ တိုက်ခိုက်မှု ကြုံလာနိုင်တာကြောင့် စစ်ကောင်စီဘက်က ကြိုတင် ခုခံဖို့ အစီအစဉ် ရေးဆွဲနေတယ်လို့ သိရပါတယ်။
“နိုင်ကျဉ်းတွေတော့ မပါဘူးလို့ ကြားတယ်။ လက်ရှိအခြေအနေအရ နိုင်ကျဉ်းတွေကို လုံခြုံရေး စောင့်ခိုင်းဖို့ဆိုတာက သူတို့ စိတ်မချသေးဘူး၊ နည်းနည်းတွေးခေါ်နိုင်သေးတယ် ပြောရမှာပေါ့နော်။ သေနတ်ပေးပြီး နိုင်ကျဉ်းတွေ သုံးဖို့အထိတော့ သူတို့ မလုပ်ရဲသေးဘူးပေါ့နော်။ မဖြစ်မနေကျရင်တော့ သုံးကောင်းသုံးမှာပေါ့နော်။ လက်ရှိ အခြေအနေအရတော့ သူတို့ကို ပြန်ပစ်နိုင်မယ့်သူတွေကို သုံးနေတာမျိုး မတွေ့ရသေးပါဘူး” လို့ ကိုသိုက်ထွန်းဦးက သုံးသပ်ပါတယ်။
အလားတူ ၂၀၂၃ ခုနှစ် နိုဝင်ဘာလက စတင်ခဲ့တဲ့ ၁၁၁၁ စစ်ဆင်ရေးကာလတုန်းကလည်း လွိုင်ကော်အကျဉ်းထောင်မှာ အကျဉ်းကျနေတဲ့ ရဲအုပ်၊ ဗိုလ်အဆင့် ရှိသူတွေကို မူလရာထူး ပြန်ပေးပြီး တာဝန်ပြန်ထမ်းဆောင်ခိုင်းတာမျိုး ရှိခဲ့ဖူးပါတယ်။
တော်လှန်ရေး အင်အားစုတွေ ထိန်းချုပ်နိုင်တဲ့မြို့ရှိ အကျဉ်းထောင်ကနေ နိုင်ငံရေးအကျဉ်းသူ အကျဉ်းသားတွေ လွတ်မြောက်လာပေမဲ့ စစ်ကောင်စီ ထိန်းချုပ်ထားတဲ့ မြို့တွေက အကျဉ်းထောင်မှာတော့ ဖိနှိပ်မှု ပိုခံလာရတယ်လို့ ထောင်နဲ့ နီးစပ်သူတွေဆီက သိရပါတယ်။
