ယာရူစိင်း၊ ဖေဖော်ဝါရီ ၁ ရက်၊ မူဆယ်
ရှမ်းမြောက် မူဆယ် ၁၀၅ မိုင်အုပ်စုရှိ အောက်နမ့်ဟွယ်ရွာမှာ ဆိုင်ကယ်တိမ်းမှောက်မှုဖြစ်ပြီး အမျိုးသားနှစ်ဦးထဲက တစ်ဦးဟာ သေဆုံးသွားပြီးတော့ တစ်ဦးက ခြေတစ်ဖက် ကျိုးသွားတယ်လို့ သိရပါတယ်။
ဖြစ်စဥ်ဟာ ဇန်နဝါရီ ၃၀ ရက် ညနေ ၆ နာရီမှာ ဖြစ်ပွားခဲ့တာဖြစ်ပြီး ၁၀၅ မိုင်ကနေ ဆိုင်ကယ် မောင်းနှင်လာတဲ့ အဲဒီအမျိုးသားနှစ်ဦးက နမ့်ဟွယ်ရွာလမ်းမကြီးဘေးမှာ ရပ်ထားတဲ့ လယ်ထွန်စက်ကို ဝင်တိုက်မိရာကနေ တမ်းမှောက်မှု ဖြစ်သွားခဲ့တာ ဖြစ်ပါတယ်။
မြေပြင်အခြေအနေသိရှိသူ အမျိုးသားတစ်ဦးက “သူတို့နှစ်ယောက်က အရှိန်နဲ့မောင်းလာတော့ လယ်ထွန်စက်ကို တိုက်မိတာပေါ့။ ဆေးကုသစရိတ်အားလုံးကို အဲဒီ လယ်ထွန်စက်ပိုင်ရှင်က တာဝန်ယူပြီး ဆေးကုသပေးတယ်။ သေသွားတဲ့ ကလေးရဲ့ အသုဘကိုလည်း တာဝန်ယူပြီး ချပေးခဲ့တယ်” လို့ ပြောပါတယ်။
သေဆုံးသူဟာ အသက် ၁၅ နှစ်အရွယ် မောင်ဟန်လင်းထွန်းဆိုသူဖြစ်ပြီး ဦးခေါင်းမှာ ထိမှန်ထားတဲ့ ဒဏ်ရာက ပြင်းထန်တာကြောင့် ဆေးကုသမှု ခံယူနေရာကနေ မနေ့ ဇန်နဝါရီ ၃၁ ရက် မနက်အစောပိုင်းမှာ သေဆုံးသွားပါတယ်။
ဝမ်းဗိုက်မှာ ဒဏ်ရာအနည်းငယ်နဲ့ ခြေတစ်ဖက် ကျိုးသွားသူကတော့ အသက် ၂၀ အရွယ်ရှိတဲ့ အမျိုးသားတစ်ဦး ဖြစ်တယ်လို့ သိရပါတယ်။
ဆိုင်ကယ် တိမ်းမှောက်မှုဖြစ်ပြီး ဒဏ်ရာရသူကို ၁၀၅ မိုင်ရှိ ပါရမီလူမှုကူညီရေးအသင်းက သွားရောက် ကူညီပေးခဲ့တယ်လို့လည်း သိရပါတယ်။
အလားတူ နမ္မတူမြို့နယ် မန်စံရွာမှာလည်း ပြီးခဲ့တဲ့ ဇန်နဝါရီ ၂၉ ရက်က ကားနဲ့ စက်ဘီး တိုက်မိပြီး စက်ဘီးမောင်းတဲ့ အမျိုးသား ဒဏ်ရာအပြင်းအထန် ရရှိခဲ့ပါတယ်။
