မိုင်းရူပ၊ ဖေဖော်ဝါရီ ၅ ရက်၊ တာချီလိတ်
ရှမ်းအရှေ့ တာချီလိတ်မြို့အပါအဝင် ငွေလိမ်ဂိုဏ်းတွေကို နှိမ်နင်းဖို့ ထိုင်း-မြန်မာနယ်စပ်က မြဝတီနဲ့ ဘုရားသုံးဆူမြို့ကို ထိုင်းဘက်က မီးဖြတ်လိုက်ပြီလို့ ရွှေဖီမြေက စုံစမ်းသိရှိရပါတယ်။
ထိုင်းနိုင်ငံရဲ့ နိုင်ငံတော် လုံခြုံရေးကို ခြိမ်းခြောက်လာတဲ့ အွန်လိုင်းက ငွေလိမ်လုပ်ငန်းကို နှိမ်နင်းဖို့ လျှပ်စစ်မီး ဖြတ်မယ်လို့ ထိုင်းနိုင်ငံ ဒုကာကွယ်ရေးဝန်ကြီးချုပ်က ပြောဆိုပြီးနောက် ဒီနေ့ ဖေဖော်ဝါရီ ၅ ရက် မနက် ၉ နာရီကစပြီး ထိုင်းဘက်က လျှပ်စစ်မီးတွေ ဖြတ်တောက်ခဲ့တာ ဖြစ်ပါတယ်။
တာချီလိတ်မြို့မှာတော့ ထိုင်းဘက်က လျှပ်စစ်မီး ဖြတ်တောက်ပြီးနောက်ပိုင်း လာအိုနိုင်ငံကပေးတဲ့ လျှပ်စစ်မီးကို အသုံးပြုနေတယ်လို့ တာချီလိတ်ဒေသခံ အမျိုးသမီးတစ်ဦးက ရွှေဖီမြေကို ပြောပါတယ်။
“ထိုင်းဘက်က မီးဖြတ်လိုက်ပြီ။ လာအိုမီး သုံးနေတာ။ မြဝတီ ဂယက်ကြောင့်ဖြစ်မှာ။ ထိုင်းက မြန်မာကိုပေးတာ မှန်သမျှ အကုန်ဖြတ်လိုက်တဲ့ သဘောပေါ့”
ပြီးခဲ့တဲ့ ဇန်နဝါရီလထဲ ထိုင်း-မြန်မာနယ်စပ်မှာရှိတဲ့ အွန်လိုင်း ငွေလိမ်ဂိုဏ်းမှာ တရုတ်နိုင်ငံသား သရုပ်ဆောင်တွေ ပျောက်ဆုံးမှု ဖြစ်ပြီးနောက်ပိုင်း အွန်လိုင်း ငွေလိမ်ဂိုဏ်းကို နှိမ်နင်းလာတာ ဖြစ်ပါတယ်။
စစ်ခေါင်းဆောင် ဗိုလ်ချုပ်မှူးကြီး မင်းအောင်လှိုင်ကလည်း အွန်လိုင်း ငွေလိမ်ဂိုဏ်းတွေမှာ ပါဝင်ပတ်သက်နေတဲ့ တာဝန်ရှိသူတွေကို အရေးယူမယ်လို့ ဖေဖော်ဝါရီ ၃ ရက်က စစ်ကောင်စီရဲ့ ပြည်ထောင်စုအစိုးရအဖွဲ့ အစည်းအဝေးမှာ ပြောကြားခဲ့ပါတယ်။
၂၀၂၃ ခုနှစ် အောက်တိုဘာ ၅ ရက်ကနေ ဒီလ ဇန်နဝါရီ ၁၃ ရက်အထိ ရှမ်းမြောက် မူဆယ်၊ လောက်ကိုင်၊ ရှမ်းအရှေ့ တာချီလိတ်နဲ့ ကရင်ပြည်နယ် မြဝတီမြို့အပါအဝင် တခြားနယ်စပ်ဒေသရှိ တရားမဝင် ငွေလိမ်ဂိုဏ်းမှာ လုပ်ကိုင်နေတဲ့ နိုင်ငံခြားသား ၅ သောင်းကျော်ကို သက်ဆိုင်ရာ နိုင်ငံတွေထံ လွှဲပြောင်းပေးခဲ့တယ်လို့ စစ်ကောင်စီက ဇန်နဝါရီ ၂၀ ရက်မှာ သတင်းထုတ်ပြန်ထားပါတယ်။
မြန်မာနိုင်ငံအတွင်းရှိ အွန်လိုင်း ငွေလိမ်ဂိုဏ်းမှာ စစ်ကောင်စီရဲ့ လက်အောက်ခံ နယ်ခြားစောင့်တပ်၊ ပြည်သူ့စစ်နဲ့ တခြားမဟာမိတ်အဖွဲ့ဟာ လုံခြုံရေး ပေးတာနဲ့ အထောက်အကူပြုတာတွေကို တိုက်ရိုက်ပါဝင်ပတ်သက်နေတယ်လို့ အမျိုးသားညီညွတ်ရေးအစိုးရ- NUG နဲ့ ကရင်အမျိုးသားအစည်းအရုံး- KNU အပါအဝင် အဖွဲ့ ၅ ဖွဲ့ပါဝင်တဲ့ ဖယ်ဒရယ် ဒီမိုကရေစီအင်အားစုက ကြေညာချက် ထုတ်ပြန်ထားပါတယ်။
