ရွှေဖီမြေ၊ ဧပြီ ၁ ရက်၊ နမ္မတူ
ငလျင်ဘေးဒဏ်သင့် လူထုတွေကို လူသားချင်း စာနာထောက်ထားမှုအနေနဲ့ တအာင်းဒေသတွင်း သင်္ကြန်ပွဲတော် ကျင်းပခွင့် မပြုတော့ကြောင်း တအာင်းတပ်မတော်- PSLF/TNLA ရဲ့ ဗဟိုအုပ်ချုပ်ရေးဌာနက ဒီနေ့ ဧပြီ ၁ ရက်မှာ ထုတ်ပြန်လာပါတယ်။
တအာင်းတပ် ထိန်းချုပ်ထားတဲ့ ကျောက်မဲခရိုင်၊ မိုးကုတ်ခရိုင်၊ ကွတ်ခိုင်ခရိုင်၊ နမ့်ဆန်ခရိုင်နဲ့ နမ့်ခမ်းခရိုင်တွေမှာ သင်္ကြန်ပွဲတော် မပြုလုပ်ကြဖို့ အသိပေးထားတာပဲ ဖြစ်ပါတယ်။
သင်္ကြန်ပွဲတော်ကို ကျင်းပဖို့အတွက် စီစဉ်ထားပေမဲ့ ပြီးခဲ့တဲ့ မတ်လ ၂၈ ရက်က ပြင်းအား ၇.၇ အဆင့်ရှိတဲ့ ငလျင်လှုပ်ခတ်မှု ဖြစ်ပွားပြီးနောက် လူထောင်ချီ သေဆုံးခဲ့သလို လက်ရှိအချိန်ထိ ကယ်ဆယ်ရေးလုပ်ငန်း လုပ်ဆောင်နေဆဲ ဖြစ်တာကြောင့် လူသားချင်း စာနာတဲ့အတွက် သင်္ကြန်ပွဲတော် ကျင်းပမယ့်အစီအစဉ်ကို ဖျက်သိမ်းလိုက်တာလို့ ဆိုပါတယ်။
မိုင်းလားတပ်မတော်- NDAA ကလည်း အထူးဒေသ(၄)မှာ ကျင်းပဖို့ ပြင်ဆင်နေတဲ့ သင်္ကြန်ပွဲတော်ကို ငလျင်ဘေးဒဏ်သင့်တဲ့ လူထုတွေကို စာနာတဲ့အနေနဲ့ ဖျက်သိမ်းလိုက်ပြီး ကိုးကန့်တပ်- MNDAA ကလည်း ကျင်းပမယ့် သင်္ကြန်ပွဲတော်ကို ဖျက်သိမ်းလိုက်ပါတယ်။
မတ်လ ၂၈ ရက် နေ့လယ် ၁ နာရီခန့်မှာ မန္တလေးမြို့ အရှေ့မြောက်ဘက် ၁၂ မိုင်အကွာကို ဗဟိုပြုပြီး လှုပ်ခတ်ခဲ့တဲ့ ငလျင်ကြောင့် မနေ့ မတ်လ ၃၁ ရက်အထိ နိုင်ငံတစ်ဝန်းမှာ သေဆုံးသူ ၂,၀၅၆ ဦးနဲ့ ဒဏ်ရာရသူ ၃,၉၀၀ ဦးရှိပြီး ပျောက်ဆုံးနေသူ ၃၀၀ ရှိနေကြောင်း သတင်းဌာနတွေမှာ ရေးသားဖော်ပြထားပါတယ်။
