မိုင်းညီခြိူဝ်းဇာရ်၊ ဖေဖော်ဝါရီ ၂၈ ရက်၊ နမ္မတူ
နမ္မတူမြို့နယ် မန်စံမိုင်းမုကျေးရွာအုပ်စုမှာ ပြောင်းဖူး စိုက်ပျိုးရေးကနေ ကြံစိုက်ပျိုးရေးလုပ်ငန်းကို ပြောင်းလဲလုပ်ကိုင်လာသူတချို့ဟာ ကြံသကာလုပ်ငန်းကနေ ဈေးကောင်း ရနေကြပါတယ်။
၂၀၂၀ ခုနှစ်ကစပြီး ကြံသကာအဖြစ် ထုတ်လုပ်ရောင်းချရာကနေ အရင်နှစ်ထက် အမြတ် ပိုရနေကြောင်း ကြံသကာ လုပ်ကိုင်နေသူ ဆမ်ခါကျေးရွာခံ ဒေါ်နန်းအေးမုန်းက ပြောပါတယ်။
“အရင်နှစ်က တစ်ပိဿာ လေးထောင် ရောင်းတယ်။ ဒီနှစ်က ခြောက်ထောင်အထိ ရောင်းရတယ်။ အမြတ်အားလုံးက သိန်းခြောက်ဆယ်နီးပါး ရတယ်”
ကြံစိုက်ပျိုးမှုဟာ ၄ နှစ်ကို တစ်ကြိမ်သာ စိုက်ရတဲ့လုပ်ငန်းဖြစ်ပြီး တခြားစိုက်ပျိုးရေးသီးနှံတွေလို နှစ်စဉ် စိုက်ပျိုးစရာ မလိုဘူးလို့ သိရပါတယ်။
ကြံစိုက်ပျိုးရေးကို ဓာတ်မြေဩဇာ မသုံးဘဲ သဘာဝ မြေဩဇာကိုသာ အဓိက အသုံးပြုတယ်လို့ နောင်းငင်းရွာခံ ဦးမြင့်ဦးက ပြောပါတယ်။
“ကြံစိုက်တဲ့အချိန်က ဓာတ်မြေဩဇာ မသုံးဘူး ဈေးကြီးလို့လေ။ တစ်ဧကကို ပိဿာချိန် သုံးထောင်ဝန်းကျင် ရတယ်။ ဒီနှစ်က ပိုရောင်းအားကောင်းတယ်။ ခြံအထိ လာဝယ်ယူကြတယ်”
ကြံ အများစုကို မူဆယ်မြို့နယ် နမ့်အွမ်ရွာရှိ သကြားစက်ရုံမှာ အဓိက တင်ပို့ကြပြီး တစ်တန်ကို တရုတ်ငွေ ယွမ် ၃ဝဝ (ကျပ် ၂ သိန်း) ရရှိပြီး တစ်နိုင်တစ်ပိုင် ကြံသကာ ထုတ်လုပ်ရင်တော့ ကျပ်ငွေ ၄ သိန်းကျော် ရနေပါတယ်။
မန်စံမိုင်းမုအုပ်စုထဲက နောင်ငင်း၊ မန်မောင်၊ ဆမ်ခါနဲ့ မိုင်းမုကျေးရွာမှ ဒေသခံတွေဟာ ကြံတွေ ပိုမိုစိုက်ပျိုးလာကြပါတယ်။
