မိုင်းရူပ၊ စက်တင်ဘာ ၁၇ ရက်၊ လားရှိုး
ကျောက်မဲ တိုက်ပွဲကြောင့် စစ်ကောင်စီထိန်းချုပ်ထားတဲ့ လားရှိုးမြို့ပေါ်ကို စစ်ရှောင်လာတဲ့ သူတွေကို စစ်ကောင်စီရဲ့ ရှမ်းပြည်ဝန်ကြီးချုပ် ဦးအောင်အောင် လာကူပေးတဲ့ ဆန်အိတ် ၁၀၀ ကျော်ကို ဆန်ဆိုင်ပိုင်ရှင် ပြန်လာသယ်သွားတယ်လို့ ရွှေဖီမြေက စုံစမ်းသိရှိရပါတယ်။
ပြီးခဲ့တဲ့ စက်တင်ဘာ ၁၀ ရက်မှာ လားရှိုးမြို့ ရှမ်းစာပေ နဲ့ ယဉ်ကျေးမှုရုံးရှိ စစ်ရှောင်တွေကို ရှမ်းပြည်ဝန်ကြီးချုပ် ဦးအောင်အောင်က လာရောက်တွေ့ဆုံခဲ့ရာ ဆန်အိတ် ၁၄၀ အပါအဝင် ကြက်ဥ၊ ဆီ နဲ့ ခေါက်ဆွဲထုပ်တွေကို လာရောက်ကူညီပေးခဲ့တာ ဖြစ်ပါတယ်။
မနေ့ စက်တင်ဘာ ၁၆ ရက်မှာတော့ ဆန်ပိုင်ရှင်ဘက်က ရှမ်းစာပေ နဲ့ ယဉ်ကျေးမှုရုံးရှိ ဦးအောင်အောင် လာလှူပေးတဲ့ ဆန်အိတ်တွေထဲက ၁၂၀ အိတ်ကို ပြန်သယ်သွားတယ်လို့ စစ်ဘေးရှောင်တွေကို ကူညီပေးနေသူနဲ့ နီးစပ်တဲ့ လားရှိုးဒေသခံ အမျိုးသားတစ်ဦးက ရွှေဖီမြေကို ပြောပါတယ်။
“၁၀ ရက်နေ့မှာ လာလှူသွားတာပေါ့။ ဆန်၊ ကြက်ဥ၊ ခေါက်ဆွဲတွေ ပါတယ်။ မနေ့ကျတော့ ဆန်ဂိုဒေါင်ဘက်က ဆန်အိတ် ၁၂၀ အိတ်ကို ပြန်လာတင်သွားတယ်။ ဆန်ဂိုဒေါင်ဘက်က ဘာပြောသွားလဲဆိုတော့ ဆန်ကုန်တင်၊ ကုန်ချဖိုးတောင်မှ ဘယ်သူဆီ တောင်းရမှန်း မသိဘူးတဲ့။ ဆန်လာယူတဲ့အချိန် ထွေအုပ်က ဝန်ထမ်းတွေလည်းပါတယ်” လို့ ဆိုပါတယ်။
ကြက်ဥ၊ စာသုံးဆီ နဲ့ ခေါက်ဆွဲထုပ်တွေကိုတော့ လာရောက်ယူတာ မရှိသေးဘဲ ဆန်ဖိုး မရှင်းတာကြောင့် ဆန်ပိုင်ရှင်ဘက်က လာရောက်သယ်သွားတာ ဖြစ်နိုင်တယ်လို့ သူက ဆက်ပြောပါတယ်။
“လှူမယ်ဆိုလည်း ရှမ်းစာပေ ယဉ်ကျေးမှုရုံးကို လာပို့ခိုင်းတာလေ။ မနေ့မှာ အဲဒီဆန်ပိုင်ရှင်ကပဲ ပြန်လာသယ်သွားတယ်။ လာပို့တဲ့နေ့ကတည်းက ဒါကို မသုံးသေးနဲ့လို့ သူတို့ကိုယ်တိုင် လာပြောသွားတယ်”
ကျောက်မဲမြို့နယ်က စစ်ကောင်စီနဲ့ တအာင်းတပ်မတော် – TNLA အကြား တိုက်ပွဲတွေကြောင့် ထောင်နဲ့ချီတဲ့ ဒေသခံတွေ လားရှိုးမြို့ပေါ်ကို လာရောက်တိမ်းရှောင်ကြတာ ဖြစ်ပါတယ်။
တစ်ဖက်မှာလည်း လားရှိုးမြို့ပေါ်ရှိ လာရောက်တိမ်းရှောင်တဲ့ စစ်ရှောင်တွေကို စစ်ကောင်စီက ကျင်းပမယ့် ရွေးကောက်ပွဲမှာ မဲပေးခိုင်းတာတွေ ပြုလုပ်လာနိုင်တယ်လို့ ပြောဆိုမှုတွေ ရှိနေပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
