သတင်းဓာတ်ပုံ
မိုင်းရူပ၊ ဖေဖော်ဝါရီ ၁၆ ရက်၊ နမ္မတူ
ကျောင်းဆရာဘဝကနေ တအာင်းတပ်မတော်- PSLF/TNLA ရဲ့ တပ်သား စုဆောင်းတာ ခံရပြီး စစ်သင်တန်း မတက်ရဘဲ ရှေ့တန်း ထွက်ခဲ့ရကာ ကျဆုံးသွားတဲ့ ကျောင်းဆရာ မိုင်းအိုက်လေးရဲ့ နာရေးမြင်ကွင်း ဖြစ်ပါတယ်။
အသက် ၂၁ နှစ်အရွယ် မိုင်းအိုက်လေးဟာ ပြီးခဲ့တဲ့ ဖေဖော်ဝါရီ ၁၃ ရက်မှာ ရှမ်းမြောက် နောင်ချိုမြို့နယ် တောင်းခမ်းရွာတိုက်ပွဲမှာ စစ်ကောင်စီတပ်ရဲ့ လက်နက်ကြီး ထိမှန်ပြီး ကျဆုံးခဲ့တာ ဖြစ်ပါတယ်။
တအာင်းပညာရေးအကယ်ဒမီ- TEA ကျောင်း ဆင်းထားတဲ့ မိုင်းအိုက်လေးဟာ ရှမ်းမြောက် နမ္မတူမြို့နယ် ပန်သပြေရွာမှာ တအာင်းပြည် ပညာရေးကောင်စီ- TLEC က ဖွင့်လှစ်ထားတဲ့ စာသင်ကျောင်းမှာ တာဝန်ထမ်းဆောင်နေတာ ဖြစ်ပါတယ်။
ပြီးခဲ့တဲ့ ၂၀၂၄ နိုဝင်ဘာလက TNLA တပ်ဖွဲ့ထဲ တာဝန်ထမ်းဆောင်နေတဲ့ မိုင်းအိုက်လေးရဲ့ အစ်ကိုဖြစ်သူဟာ ကျန်းမာရေး မကောင်းလို့ ခွင့်ယူထားချိန် အစ်ကိုဖြစ်သူအစား စစ်မှုထမ်း သွားခဲ့ရတာ ဖြစ်ပါတယ်။
လူမျိုးကို ချစ်လို့ အမျိုးသားရေးအတွက် စတိုက်ပွဲ ဝင်ခဲ့ပေမဲ့ စစ်သင်တန်း မပေးသေးဘဲ သားဖြစ်သူကို TNLA က ရှေ့တန်း ပို့လိုက်တာဟာ မဖြစ်သင့်ဘူးလို့ မိသားစုဝင်က ပြောဆိုကြပါတယ်။
မိုင်းအိုက်လေးဟာ ရှမ်းမြောက် နမ္မတူမြို့နယ် ပန်လုံကျေးရွာအုပ်စုထဲ နေထိုင်သူ ဖြစ်ပါတယ်။
