မိုင်းရူပ၊ မတ်လ ၂၂ ရက်၊ နောင်ချို
တအာင်းတပ်မတော် TNLA ထိန်းချုပ်ထားတဲ့ ရှမ်းမြောက် နောင်ချိုမြို့ပေါ်ကို စစ်ကောင်စီက လေယာဥ်နဲ့ ဟောင်ဝစ်ဇာအသုံးပြုပြီး တိုက်ခိုက်ခဲ့တယ်လို့ မြေပြင်အခြေအနေ သိရှိသူတွေက ရွှေဖီမြေကို ပြောပါတယ်။
ဒီနေ့ မတ်လ ၂၂ ရက် မနက် ၁၁ နာရီခွဲဝန်းကျင်မှာ နောင်ချိုမြို့ တောင်ရပ်ကွက်ကို Y-12 လေယာဥ်အသုံးပြုပြီး တိုက်ခိုက်ခဲ့သလို ၁၁ နာရီ ၄၅ မိနစ်မှာ ဟောင်ဝစ်ဇာ လက်နက်ကြီးအသုံးပြုပြီး နောင်ချိုမြို့ပေါ်ကို ထပ်မံတိုက်ခိုက်ခဲ့ပါတယ်။
စစ်ကောင်စီရဲ့ လေကြောင်းတိုက်ခိုက်မှုနဲ့ ဟောင်ဝစ်ဇာလက်နက်ကြီးကြောင့် လူထိခိုက်သေဆုံးမှုမရှိဘဲ အုတ်တံတိုင်းအချို့ ထိခိုက်ပျက်စီးခဲ့တယ်လို့ မြေပြင်အခြေအနေ သိရှိသူတစ်ဦးက ရွှေဖီမြေကို ပြောပါတယ်။
” Y- 12 နဲ့ ဗုံး ၂ လုံး လာကြဲတာ။ ပြီးတော့ လက်နက်ကြီးနဲ့လည်း ပစ်လာတယ်။ လူထိတာတော့ မရှိဘူး။ အုတ်တံတိုင်း နည်းနည်းပဲ ပျက်တာ” လို့ ဆိုပါတယ်။
ဒါ့အပြင် ဒီနေ့တစ်ရက်တည်းမှာပင် နောင်ချိုမြို့နယ် အုမ္မခါးရွာထဲကို စစ်ကောင်စီက ဒရုန်းနဲ့ ဗုံး ၄ လုံး ထပ်မံကြဲချတိုက်ခိုက်ခဲ့ရာ အရပ်သားတစ်ဦး ဒဏ်ရာရခဲ့တယ်လို့ သူက ဆက်ပြောပါတယ်။
နောင်ချို့မြို့ကို TNLA ထိန်းချုပ်ပြီးနောက် စစ်ကောင်စီတပ်ဟာ ဗုံးကြဲတိုက်ခိုက်မှုတွေ မကြာခဏပြုလုပ်နေပြီး ပြီးခဲ့တဲ့ မတ်လ ၁၆ ရက် ညနေပိုင်းမှာ နောင်ချိုမြို့ပေါ်ရှိ စိန်ရတနာပရိယတ္တိစာသင်တိုက်ကို ဂျက်လေယာဥ်နဲ့ ဗုံးကြဲတိုက်ခိုက်ခဲ့ရာ ကိုရင်တွေအပါအဝင် သေဆုံးသူ ၁၀ ဦးနဲ့ ဒဏ်ရာရသူ ၁၈ ဦး ရှိခဲ့ပါတယ်။
နောင်ချိုမြို့နယ် တောင်ခမ်းကျေးရွာနဲ့ အုမ္မတီးကျေးရွာတွေမှာတော့ စစ်ကောင်စီတပ်နဲ့ TNLA အကြား တိုက်ပွဲတွေ ဆက်လက်ပြင်းထန်နေပါတယ်။
