မိုင်းရူပ၊ ဧပြီ ၂၀ ရက်၊ လားရှိုး
စစ်ကောင်စီ ပြန်အုပ်ချုပ်မယ့် ရှမ်းမြောက် လားရှိုးမြို့မှာ စစ်ကောင်စီ၊ ကိုးကန့်တပ်နဲ့ တရုတ်ကိုယ်စားလှယ်တို့ ဆွေးနွေးနေပြီး မြို့အဝင်အထွက်လမ်းကို ယာယီ ပိတ်ထားတယ်လို့ လားရှိုးမြို့ခံတွေက ရွှေဖီမြေကို ပြောပါတယ်။
ဒီနေ့ ဧပြီ ၂၀ ရက် မနက်ကစပြီး ဆင်နှစ်ကောင်ဟိုတယ်မှာ စစ်ကောင်စီ၊ ကိုးကန့်တပ်နဲ့ တရုတ်ကိုယ်စားလှယ်တို့ ဆွေးနွေးနေပြီး မြို့အဝင်အထွက်လမ်း ယာယီ ပိတ်ထားပြီးတော့ ဒီနေ့ညနေပိုင်း ၆ နာရီမှာ လမ်းပြန်ဖွင့်မယ်လို့ သိထားရကြောင်း လားရှိုးမြို့ရှိ သတင်းအရင်းအမြစ်တစ်ဦးက ရွှေဖီမြေကို ပြောပါတယ်။
“စကစတွေ ဆင်နှစ်ကောင် ဟိုတယ်မှာ ရောက်နေလို့ အစည်းအဝေး ထိုင်နေကြလို့ လမ်းပိတ်ထားတာ။ ညနေ ၆ နာရီမှ ဖွင့်မယ်တဲ့။ အစည်းအဝေးမှာ တရုတ်လည်း ပါတယ်”
လားရှိုးမြို့မှာ တရုတ်နိုင်ငံရဲ့ အပစ်ရပ် စောင့်ကြည့်ရေးအဖွဲ့ ရောက်ရှိနေပြီး ဆင်နှစ်ကောင် ဟိုတယ်မှာ ပြုလုပ်နေတဲ့ အစည်းအဝေးမှာ တရုတ်အထူးကိုယ်စားလှယ် မစ္စတာ တိန်ရှီကျွင်းကိုယ်တိုင် ဦးဆောင်နေတယ်လို့ ဒေသခံတွေက ပြောဆိုပေမဲ့ ရွှေဖီမြေက သီးခြား အတည်ပြုနိုင်ခြင်း မရှိသေးပါဘူး။
လာမယ့် ဧပြီ ၂၂ ရက်မှာလည်း လားရှိုးမှာ စစ်ကောင်စီ၊ ကိုးကန့်တပ်နဲ့ တရုတ်ကိုယ်စားလှယ်တို့အကြား ထပ်မံ တွေ့ဆုံဖို့ ရှိကြောင်း ရွှေဖီမြေက စုံစမ်းသိရှိရပါတယ်။
တရုတ်ရဲ့ ကြားဝင်စေ့စပ်မှုနဲ့ စစ်ကောင်စီနဲ့ MNDAA အကြား အပစ်ရပ်ဖို့ သဘောတူခဲ့ပြီးနောက် ကိုးကန့်တပ်ဟာ ဧပြီ ၂၁ ရက် နောက်ဆုံးထားကာ လားရှိုးမြို့ကနေ ထွက်ခွာရမှာဖြစ်ပြီး စစ်ကောင်စီရဲ့ အုပ်ချုပ်ရေးယန္တရား ဝင်ရောက် လည်ပတ်မှာ ဖြစ်ပါတယ်။
လားရှိုးအရေးနဲ့ ပတ်သက်ပြီး စစ်ကောင်စီရော ကိုးကန့်တပ်ဘက်ကပါ တရားဝင် ထုတ်ပြောတာ မရှိသေးပါဘူး။
စစ်ကောင်စီရဲ့ အရှေ့မြောက်တိုင်းစစ်ဌာနချုပ် အခြေစိုက်ရာ လားရှိုးမြို့ကို MNDAA နဲ့ နွေဦးတော်လှန်ရေးတပ်တွေက ပူးပေါင်းပြီး ပြီးခဲ့တဲ့ ၂၀၂၄ ခုနှစ် ဩဂုတ် ၃ ရက်မှာ တိုက်ခိုက်သိမ်းပိုက်ခဲ့တာပဲ ဖြစ်ပါတယ်။
