မိုင်းရူပ၊ စက်တင်ဘာ ၂၅ ရက်၊ ကျောက်မဲ
စစ်ကောင်စီတပ်ဟာ ၎င်းတို့ လက်လွှတ်ထားရတဲ့ ကျောက်မဲမြို့ကို ပြန်ရဖို့ စစ်အင်အားတွေ ဖြည့်တင်းကာ အပြင်းအထန် ထိုးစစ်ဆင်နေပြီး လေကြောင်းကနေ ဗုံးကြဲ တိုက်ခိုက်တာတွေ ပြုလုပ်နေတယ်လို့ ရှေ့တန်း စစ်မြေပြင်မှာ ရှိနေသူတွေက ပြောပါတယ်။
ဒီနေ့ စက်တင်ဘာ ၂၅ ရက်အထိ စစ်ကောင်စီတပ်ဟာ နောင်ချို-ကျောက်မဲလမ်းမကြီးပေါ်ရှိ နားအိုက်ခန့်နဲ့ စခန်းသာကျေးရွာကြားမှာ ရောက်ရှိနေပြီး စစ်ကောင်စီနဲ့ တအာင်းတပ်မတော်–TNLA အကြား တိုက်ပွဲ ဆက်ပြင်းထန်နေပါတယ်။
“အခု စစ်ကောင်စီက နောက်တန်းက အင်အားတွေကိုပါ ရှေ့တန်း ပို့လာတယ်။ ဒီနေ့က နားအိုက်ခန့်နဲ့ စခန်းသာရွာကြားမှာ တိုက်ပွဲ ပြင်းထန်နေတယ်။ TNLA လည်း ခံစစ် ပြင်ထားပြီး ခုခံနေတာ” လို့ ရှေ့တန်း စစ်မြေပြင်မှာ ရှိနေသူ တစ်ဦးက ရွှေဖီမြေကို ပြောပါတယ်။
ဒါ့အပြင် ဒီနေ့ မနက်ပိုင်းမှာ တိုက်ပွဲ ဖြစ်ပွားရာ အနီးတစ်ဝိုက်ကို ဂျက်လေယာဉ်နဲ့ Y-12 လေယာဉ် အသုံးပြုပြီး ဗုံးအလုံးရေ ၃၀ထက်မနည်း ကြဲချတိုက်ခိုက်ခဲ့သလို ဒီနေ့ နေ့လည်ပိုင်းမှာလည်း Y-12 လေယာဉ်နဲ့ဗုံးကြဲ တိုက်ခိုက်နေပါတယ်။
လက်ရှိ တိုက်ပွဲဖြစ်ပွားနေတဲ့ နားအိုက်ခန့်နဲ့ စခန်းသာရွာကြားမှာ တအာင်းတပ် ထိန်းချုပ်ထားတဲ့ ကျောက်မဲမြို့ပေါ်နဲ့ ၈ မိုင် ဝန်းကျင်သာ ကွာဝေးတယ်လို့ သိရပါတယ်။
ကျောက်မဲမြို့နယ်ထဲ စစ်ကောင်စီနဲ့ TNLA အကြား တိုက်ပွဲ ပြင်းထန်နေတာ ၁ လကျော် ကြာရှိနေပြီး TNLA ဘက်ကလည်း ကျောက်မဲမြို့ လက်မလွှတ်ရရေး ဆက်လက် ခုခံနေဆဲဖြစ်ပြီး တိုက်ပွဲဆက်ပြင်းထန်လာမယ့်အခြေအနေလို့ ရှေ့တန်းစစ်မြေပြင်မှာ ရှိနေသူတွေက ပြောပါတယ်။
စစ်ကောင်စီတပ်ဟာ ကျောက်မဲနဲ့ သီပေါမြို့နယ်ကို ရွေးကောက်ပွဲ ကျင်းပမယ့် နယ်မြေထဲ ထည့်သွင်းထားပြီး ရွေးကောက်ပွဲ မတိုင်ခင် အဲဒီမြို့နယ် ၂ ခုကို ထိန်းချုပ်ဖို့ ထိုးစစ်ဆင် တိုက်ခိုက်နေတာ ဖြစ်ပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှု နားဆင်နိုင်ပါတယ်။
