မိုင်းပန်ပျော်၊ ဇန်နဝါရီ ၁၉ ရက်၊ တာချီလိတ်
ထိုင်း-မြန်မာနယ်စပ်ဖြစ်တဲ့ ရှမ်းအရှေ့ တာချီလိတ်မြို့မှာရှိတဲ့ KTV နဲ့ ဂိမ်းဆိုင်တွေဆီကနေ စစ်ကောင်စီတပ်က တစ်လကို သိန်း ၅ဝဝ အထိ တောင်းနေတယ်လို့ ဒေသခံတွေက ရွှေဖီမြေကို ပြောပါတယ်။
တာချီလိတ်မြို့ ရွှေတိဂုံဘုရားအောက်မှာရှိတဲ့ ဂိမ်းဆိုင်တစ်ဆိုင်ကို သိန်း ၂၀ အထိ တောင်းပြီး KTV ဆိုင်တွေကလည်း သိန်း ၁၀၀ ကနေ သိန်း ၅၀၀ အထိ စစ်ကောင်စီရဲ့ အရာရှိကိုယ်တိုင် လစဉ်ကြေး ကောက်နေတယ်လို့ အမည်မဖော်လိုတဲ့ သတင်းရင်းမြစ်တစ်ဦးက ပြောပါတယ်။
“ပထမတော့ သိန်းငါးရာ တောင်းတယ် ဆိုင်ရှင်က ပြသာနာ အကြီးအကျယ် ရှာခံရလို့ သိန်း ၃ဝဝ နဲ့ ပြီးသွားပါတယ်ဗျ။ တာချီလိတ် ရွှေတိဂုံဘုရားအောက်က ဂိမ်းဆိုင်တွေကို တိုင်းမှူး PSO ဆိုပြီး အာဏာပြပြီး တစ်ရုံ သိန်း ၂၀ တောင်းပါတယ်။ အရင်က ရဲ၊ စရဖ၊ ထွေအုပ်တွေကို လစဉ် ၃ သိန်းစီပေးရင် ရပါပြီ။ ဂိမ်းရုံတစ်ရုံကို သိန်း ၂၀ မပေးနိုင်ရင် မဖွင့်နဲ့လို့ မိုက်မိုက်ရိုင်းရိုင်း ပြောတာ”
စစ်ကောင်စီရဲ့ အဲဒီအရာရှိဟာ KTV နဲ့ ဂိမ်းဆိုင်အပြင် လုပ်ငန်းရှင်တွေဆီကနေလည်း သိန်း ၂၀၀ အထိ တောင်းတာ ရှိတယ်လို့ ၎င်းက ဆက်ပြောပါတယ်။
တာချီလိတ်မြို့ပေါ်မှာ ဂိမ်းဆိုင် ၆၀ ရုံလောက်ရှိပြီး KTV ဆိုင် အရေအတွက်ကိုတော့ မသိရဘူးလို့ ဆိုပါတယ်။
၁၀၂၇ စစ်ဆင်ရေးနောက်ပိုင်း ကိုးကန့်တပ်မတော်- MNDAA ထိန်းချုပ်ထားတဲ့ လောက်ကိုင်မြို့မှာ အခြေစိုက်ခဲ့တဲ့ အွန်လိုင်း ငွေလိမ်ဂိုဏ်း (ကျားဖြန့်)လုပ်ငန်းနဲ့ လောင်းကစားရုံတွေဟာ တာချီလိတ်မြို့ဘက် ပြောင်းရွှေ့လုပ်ကိုင်လာကြပါတယ်။
