ရွှေဖီမြေ၊ ဧပြီ ၂၄ ရက်၊ လားရှိုး
ဒီနေ့ ဧပြီ ၂၄ ရက်မှာ လားရှိုး-သိန္နီအထွက် အေတီတံတားမှာ လုံခြုံရေးတာဝန် ယူနေတဲ့ စစ်ကောင်စီတပ်သားတွေဟာ ကုန်ကားနဲ့အိမ်စီးကားတွေကို ငွေ စတောင်းနေပြီဖြစ်ပြီး တစ်ရက်ပျှမ်းမျှ ဝင်ငွေ သိန်းထောင်ချီ ရှိနိုင်တယ်လို့ ပေးဆောင်ခဲ့ရသူ ကုန်ကားမောင်းသူတစ်ဦးက ရွှေဖီမြေကို ပြောပါတယ်။
အိမ်စီးကားနဲ့ကုန်ကား အသေးတွေကိုတော့ မနေ့ ဧပြီ ၂၃ ရက်မှာ စတောင်းခဲ့တာဖြစ်ပြီး ကုန်ကားအကြီးတွေကိုတော့ ဒီနေ့ စတောင်းတာလို့ ကိုယ်တိုင် ကြုခဲ့ရသူတစ်ဦးက ရွှေဖီမြေကို ပြောပါတယ်။
“ကုန်ကားအရှည်ကြီး တရုတ်ကုန်ကားတွေဆို တရုတ်ငွေ ၂ ထောင် တောင်းတယ်။ တရုတ်ငွေ မပါရင် ၁၀ သိန်းပေါ့။ အဝင် ၅ သိန်း အထွက် ၅ သိန်း။ အဲလိုကုန်ကားကြီးတွေက တစ်ရက် အနည်းဆုံး ၅၀ လောက် ရှိတယ်ဆိုတော့ အဲဒါနဲ့တင် သိန်း ၅၀၀ ကျော်လောက်ရပြီ။ သူတို့က လားရှိုးအထွက် အေတီတံတားမှာ တောင်းတာ။ တံတားဟိုဘက်ခြမ်းကတော့ ကိုးကန့်က စောင့်တာ”
အိမ်စီးကားနဲ့ ကုန်ကားအသေးတွေကိုတော့ အခြေအနေပေါ် မူတည်ပြီး ညှိနှိုင်းပေးဆောင်ရတာလို့ ဆိုပါတယ်။
“ကုန်ကားအသေးကတော့ ၃ သောင်း၊ ၅ သောင်း အဲလိုပေးရတယ်။ အိမ်စီးကားကတော့ ၅ ထောင် အချို့က မပေးရဘူး” လို့လည်း သူက ပြောပါတယ်။
ကိုးကန့်တပ်ကိုတော့ ကုန်ကားအကြီးက ၂ သိန်း အခွန်ပေးဆောင်ရပြီး အခွန်များရင် ညှိနှိုင်းလို့ ရပေမဲ့ စစ်တပ်ကတော့ ညှိနှိုင်းခွင့် မရဘူးလို့ ဆိုပါတယ်။
စစ်တပ်ဘက်က အခုလို ကုန်တင်ကားတွေအပေါ် အဆမတန် ငွေ ကောက်တာကြောင့် ကုန်သည်တွေ အခက်တွေ့နေကြပြီး ကုန်စျေးနှုန်းလည်း စျေးထပ်တက်လာနိုင်တယ်လို့ ဆိုပါတယ်။
လားရှိုးမြို့ထဲ စစ်တပ်က ကားအစီးရေ ရာနဲ့ချီ ပြီးခဲ့တဲ့ ဧပြီ ၂၂ ရက်မှာ ဝင်ရောက်လာပြီး မြို့ထဲ လုံခြုံရေး စယူနေပြီ ဖြစ်ပါတယ်။
