ယာရူစိင်၊ မတ်လ ၆ ရက်၊ တာချီလိတ်
ရှမ်းအရှေ့ တာချီလိတ်မြို့မှာရှိတဲ့ KTV နဲ့ တေးဂီတ စားသောက်ဆိုင်တွေအားလုံးကို တက္ကသိုလ်ဝင်တန်း စာမေးပွဲ ကာလအတွင်း ခေတ္တပိတ်ထားရန် စစ်ကောင်စီတပ်က မတ်လ ၃ ရက်က အသိပေးထားတယ်လို့ သိရပါတယ်။
လာမယ့် မတ်လ ၁၇ ရက်ကနေ မတ်လ ၂၂ ရက်အထိ တက္ကသိုလ် စာမေးပွဲဖြေဆိုသွားမှာ ဖြစ်တဲ့အတွက် စာမေးပွဲကာလအတွင်း ပိတ်ထားရန်ဖြစ်ပြီး မတ်လ ၂၃ ရက်မှာတော့ ပြန်လည် ဖွင့်လှစ်ရန် သက်ဆိုင်ရာတွေက အသိပေးထားကြောင်း သိရပါတယ်။
တာချီလိတ်မြို့ခံ အမျိုးသားတစ်ဦးကတော့ “ပြီးခဲ့တဲ့ နှစ်လဲ အဲလိုပါဘဲ မဖွင့်ခိုင်းဘူး။ ခေတ္တပိတ်ခိုင်းတယ်ပေါ့။ ဘာမှလဲမဟုတ်ဘူး တချို့ဆိုင်တွေ ဖွင့်နေတာဘဲဗျ။ ဒီတိုင်း အသိပေးတဲ့ ပုံစံမျိုးပါဘဲ တကယ်ဆို ပုံမှန်လည်ပတ်နေတဲ့ပုံစံပေါ့။ ဆိုင်တွေ အများဆုံးက ဖွင့်နေတာဘဲလေ။ ဖွင့်တဲ့ဆိုင်တွေ့ရင် အရေးယူမယ်လို့ မနှစ်ကလဲ အသိပေးထားတာဘဲ အရေးယူတာလဲ မတွေ့ပါဘူး”လို့ ပြောပါတယ်။
တာချီလိတ်မြို့မှာရှိတဲ့ KTV နဲ့ Bar အပြင် အခြားဆိုင်တွေအပါအဝင် စစ်ကောင်စီတပ်က အကာအကွယ်ပေးတဲ့ဆိုင်တွေ ဖြစ်နေတာကြောင့် ဘယ်ဆိုင်တွေမဆို အရေးယူခံရမှာ စိုးရိမ်နေစရာ မရှိကြောင်းကို ဆက်ပြောပါတယ်။
နောက်ထပ် သတင်းအရင်းအမြစ် အမျိုးသားတစ်ဦးက ” ဘာမှမဟုတ်ဘူး ဒီအသိပေးတာက ဘယ်လိုဖြစ်ဖြစ် အရင်နှစ်တွေလိုပါဘဲဗျ။ စစ်တပ်က လုပ်စရာမရှိတော့လို့နေမှာ ကြံဖန်ပြီးတော့ ဟိုလုပ်ဒီလုပ်နဲ့ တကယ်တမ်းကျတော့လဲ သူတို့ လက်အောက်ဆိုင်တွေပဲ။ ညဆိုရင် သူတို့ စစ်ဆေးတဲ့ ဂိတ်ရောက်ရင် KTV ကနေ ပြန်လာတဲ့လို့ ပြောလိုက် သူတို့ ဘာမှ မစစ်ဆေးတော့ဘူး အေးဆေးသွားလို့ရတယ်”လို့ ပြောပါတယ်။
ဒါ့အပြင် စာမေးပွဲဖြေဆိုတဲ့ ကာလအတွင်းမှာ KTV နဲ့ တေးဂီတ စားသောက်ဆိုင်တွေကို မြို့နယ်ရဲတပ်ဖွဲ့နဲ့ မြို့နယ်ဗီဒီယိုအခြေခံအဖွဲ့က ဦးဆောင်ပြီး စစ်ဆေးသွားမှာ ဖြစ်သလို မပိတ်တဲ့ ဆိုင်တွေကို အရေးယူနိုင်ချေရှိကြောင်း သိရပါတယ်။
