မိုင်းရူပ၊ ဧပြီ ၁၃ ရက်၊ နောင်ချို
ရှမ်းမြောက် နောင်ချိုမြို့နယ် တောင်းခမ်းကျေးရွာအနီးဝန်းကျင်မှာ တအာင်းတပ်မတော်- TNLA ရဲ့ တပ်စခန်းတွေကို စစ်ကောင်စီတပ်က ဆက်လက် ထိုးစစ်ဆင် တိုက်ခိုက်နေပြီး တိုက်ပွဲ ပြင်းထန်နေတယ်လို့ ရှေ့တန်း စစ်မြေပြင်မှာ ရှိနေသူတွေက ရွှေဖီမြေကို ပြောပါတယ်။
မနေ့ ဧပြီ ၁၂ ရက်မှာ စစ်တပ်ရဲ့ ထိုးစစ်ဟာ နောင်ချိုမြို့နယ် မဲပုတ်ရွာအထိ ရောက်လာပြီး မဲပုတ်ရွာထဲ စစ်ကောင်စီတပ်နဲ့ TNLA အကြား တိုက်ပွဲ ပြင်းထန်နေတယ်လို့ ဆိုပါတယ်။
“စစ်ကောင်စီက ထိုးစစ် လုပ်နေတာ။ မနေ့ညအထိ မဲပုတ်ရွာထဲမှာ တိုက်ပွဲတွေ ပြင်းထန်နေတယ်” လို့ ရှေ့တန်းစစ်မြေပြင်မှာ ရှိနေသူတစ်ဦးက ရွှေဖီမြေကို ပြောပါတယ်။
ဒါ့အပြင် စစ်ကောင်စီရဲ့ အမြှောက်တပ်စခန်း ကွပ်ကဲမှုဌာနချုပ် ၉၀၂ အနီးမှာလည်း စစ်တပ်နဲ့ TNLA တို့အကြား တိုက်ပွဲ ပြင်းထန်နေတယ်လို့ ရှေ့တန်း သတင်းအရင်းအမြစ်တွေက ပြောဆိုပါတယ်။
ပြီးခဲ့တဲ့ ဧပြီ ၉ ရက်မှာတော့ တပ်သားသစ် အတင်းအဓမ္မ စုဆောင်းခံရတဲ့ စစ်ကောင်စီရဲ့ တပ်ဖွဲ့ဝင် ၄ ဦးဟာ စခန်းစွန့်ခွာပြီး ထွက်ပြေးနေစဉ် TNLA က အရှင်ဖမ်းဆီးရမိခဲ့တယ်လို့ သိရပါတယ်။
စစ်ကောင်စီကို ထောက်ခံတဲ့ တယ်လီဂရမ် ချန်နယ်တွေမှာတော့ မဲပုတ်ရွာကို စစ်တပ်က မနေ့ ဧပြီ ၁၂ ရက်မှာ သိမ်းပိုက်နိုင်ခဲ့တယ်လို့ ဝါဒဖြန့် ရေးသားဖော်ပြနေကြပါတယ်။
တောင်းခမ်းရွာမှာ စစ်ကောင်စီရဲ့ အမြှောက်တပ်စခန်း ကွပ်ကဲမှုဌာနချုပ် ၉၀၂ တပ်အပါအဝင် အမြှောက်တပ်တပ်စခန်းတွေဖြစ်တဲ့ ၃၅၄၊ ၂၀၆ နဲ့ ၄၀၆ တပ်တွေ အခြေချ တပ်စွဲထားတာဖြစ်ပြီး ပြီးခဲ့တဲ့ ၂၀၂၄ ခုနှစ် သြဂုတ်လကတည်းက စစ်တပ်နဲ့ TNLA တို့ တိုက်ပွဲ စတင်ဖြစ်ပွားခဲ့တာပါ။
TNLA ပါဝင်တဲ့ ညီနောင်မဟာမိတ် ၃ ဖွဲ့က ဧပြီလတစ်လလုံး အပစ်ရပ်ကြောင်း ထုတ်ပြန်ထားသလို စစ်တပ်ကလည်း ဧပြီ ၂ ရက်ကနေ ၂၂ ရက်ရက်အထိ ၃ ပတ်ကြာ အပစ်ရပ်မယ်လို့ ကြေညာထားပေမဲ့ လေကြောင်းနဲ့တိုက်ခိုက်တာ ထိုးစစ်ဆင်တာတွေ ဆက်တိုက် လုပ်ဆောင်နေပါတယ်။
