မိုင်းရူပ၊ မေလ ၂၀ ရက်၊ ကျောက်မဲ
ရှမ်းမြောက် ကျောက်မဲမြို့နယ် မိုင်းလုံမြို့ ပန်ဝိုးကျေးရွာအုပ်စုထဲမှာရှိတဲ့ တရုတ်ကုမ္ပဏီပိုင် သတ္တုတွင်းကို စစ်ကောင်စီဗုံးကြဲတိုက်ခိုက်ခဲ့ရာ ယွမ်ငွေ ၁၇ သိန်းနီးပါး ဆုံးရှုံးခဲ့တယ်လို့ ရွှေဖီမြေက စုံစမ်းသိရှိရပါတယ်။
ပြီးခဲ့တဲ့ မေလ ၁၁ ရက် ည ၁၂ နာရီခွဲမှာ ပန်ဝိုးကျေးရွာအုပ်စုထဲမှာရှိတဲ့ တရုတ်နိုင်ငံပိုင် သတ္တုတွင်းကို စစ်ကောင်စီက ဂျက်လေယာဥ်နဲ့ ပေါင် ၅၀၀ ဗုံး ၂ လုံး ကြဲချတိုက်ခိုက်ခဲ့တာ ဖြစ်ပါတယ်။
စစ်ကောင်စီရဲ့ ဗုံးကြဲတိုက်ခိုက်မှုကြောင့် စက်ရုံထဲမှာရှိတဲ့ ဘိုဒိုဇာအပါအဝင် ကုမ္ပဏီအတွင်းရှိ ပစ္စည်းတွေ မီးလောင်ပျက်စီးခဲ့ပြီး ခန့်မှန်းတန်ဖိုး တရုတ်ငွေယွမ် ၁၇ သိန်းနီးပါး (သိန်း ၁ သောင်းဝန်းကျင်) ဆုံးရှုံးခဲ့တယ်လို့ ဒီဖြစ်ကို သိရှိထားတဲ့ သတင်းအရင်းအမြစ်တစ်ဦးက ရွှေဖီမြေကို ပြောပါတယ်။
“တရုတ်တွေ လာလုပ်တာပေါ့။ သတ္တုက စထုတ်နေတုန်းပဲ ရှိသေးတာ။ ပို့တော့ မပို့ရသေးဘူး။ စစ်ကောင်စီက ပေါင် ၅၀၀ ဗုံး ၂ လုံးနဲ့ လာကြဲသွားတာ” လို့ သတင်းအရင်းအမြစ်တစ်ဦးက ရွှေဖီမြေကို ပြောပါတယ်။
စက်ရုံထဲ နေထိုင်သူတွေက တိမ်းရှောင်နိုင်တာကြောင့် စစ်ကောင်စီရဲ့ ဗုံးကြဲတိုက်ခိုက်မှုအတွင်းမှာတော့ လူထိခိုက်သေဆုံးတာ မရှိဘူးလို့ သိရပါတယ်။
မိုင်းလုံမြို့ဟာ တအာင်းတပ်မတော် PSLF/TNLA ထိန်းချုပ်ထားတဲ့ နေရာဖြစ်ပြီး အခု တရုတ်ကုမ္ပဏီ ဗုံးကြဲတိုက်ခိုက်ခံရတာနဲ့ ပတ်သက်ပြီး တအာင်းတပ်ဘက်က သတင်းထုတ်ပြန်ထားတာ မရှိသေးပါဘူး။
ဧပြီလကုန်မှာ ပြုလုပ်တဲ့ တရုတ်နိုင်ငံ ကူမင်းဆွေးနွေးပွဲ ပျက်ပြီးနောက် စစ်ကောင်စီတပ်ဟာ TNLA ထိန်းချုပ်ထားတဲ့ ကျောက်မဲ၊ မန်တုံ၊ မိုးကုတ်နဲ့ မိုင်းငေါ့ စတဲ့နေရာတွေကို လေကြောင်းနဲ့ ဗုံးကြဲတိုက်ခိုက်တာတွေ ပြုလုပ်နေပြီး အရပ်သားသေဆုံးမှုတွေလည်း ဆက်ရှိနေပါတယ်။
မေလ ၁၈ ရက်မှာလည်း ရှမ်းမြောက် နောင်ချိုမြို့နယ် အုမ္မတီးကျေးရွာမှာ စစ်ကောင်စီတပ်က စနိုက်ဘာနဲ့ ပစ်ခတ်တာကြောင့် စစ်ရှောင်အမျိုးသားတစ်ဦး သေဆုံးသွားခဲ့ပါတယ်။
စစ်ကောင်စီတပ်ဟာ မေလကုန်အထိ အပစ်ရပ်ကြောင်း ထုတ်ပြန်ထားပေမဲ့ TNLA ထိန်းချုပ်ဒေသကို လေကြောင်း၊ လက်နက်ကြီးနဲ့ ဒရုန်းအသုံးပြုပြီး ပစ်ခတ်တိုက်ခိုက်တာတွေ ပြုလုပ်နေတာကြောင့် လူထုတွေအနေနဲ့ စစ်ရေးသတိရှိကြဖို့ကို TNLA က တိုက်တွန်းထားပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
