ပျားကြီး၊ ဖေဖော်ဝါရီ ၂၅၊ ပေါက်
မကွေးတိုင်း၊ ပေါက်မြို့နယ်၊ ကင်းမကျေးရွာကို စစ်ကောင်စီက စက်တပ်လေထီး (Paramoter) နဲ့ဗုံးကြဲတိုက်ခိုက်ခဲ့တာကြောင့် အနည်းဆုံး ပြည်သူ ၃ ဦးသေဆုံးခဲ့ပြီး ၁ ဦးထိခိုက်ဒဏ်ရာရရှိခဲ့တယ်လို့ဒေသခံတွေကပြောပါတယ်။
မနေ့ ဖေဖော်ဝါရီလ ၂၄ ရက် ည ၁၁ နာရီ ၁၅ မိနစ်ဝန်းကျင်ကစပြီး အနီးအနားမှာတိုက်ပွဲတွေမရှိဘဲ ၃ ကြိမ်ထက်မနည်းဗုံးကြဲတိုက်ခိုက်ခဲ့တာဖြစ်ပါတယ်။
“တစ်ခါကြဲရင် ၂ လုံးကြဲတာ။ ၃ ကြိမ်ပေါ့။ အိမ်တွေပေါ်ကျလို့ သေတာလေ။ တစ်ယောက်က ပေါင်ရိုးကျိုးသွားတယ်”လို့ ဒေသခံတစ်ဦးကပြောပါတယ်။
ပြီးခဲ့တဲ့ ဖေဖော်ဝါရီလဆန်းပိုင်းကလည်း ကင်းမကျေးရွာကို စက်တပ်လေထီး (Paramoter) နဲ့ဗုံးကြဲတိုက်ခိုက်မှုပြုလုပ်ခဲ့သေးပေမဲ့ အဲဒီအချိန်ကလူထိခိုက်သေဆုံးမှုမရှိခဲ့ဘူးလို့ ဒေသခံတွေကဆိုပါတယ်။
စစ်ကောင်စီဟာ ၂၀၂၅ ခုနှစ် နှစ်ဆန်းပိုင်းကစပြီး မကွေးတိုင်းထဲမှာ စက်တပ်လေထီးတွေအသုံးပြုပြီးဗုံးကြဲတိုက်ခိုက်မှုတွေ ဆက်တိုက်ပြုလုပ်လာသလို ဂျက်ဖိုက်တာတွေနဲ့လည်း မကြာခဏဗုံးကြဲတိုက်ခိုက်ခဲ့တာကြောင့် လူထိခိုက်သေဆုံးမှုတွေအများအပြားရှိနေတာတွေ့ရပါတယ်။
ကင်းမရွာဟာ စစ်တပ်အာဏာသိမ်းမှုအပြီး ၂၀၂၁ ခုနှစ် အတွင်းမှာ ပထမဆုံးရွာလုံးကျွတ်မီးရှို့ဖျက်ဆီးခံခဲ့ရတဲ့ ကျေးရွာတစ်ရွာဖြစ်ပါတယ်။
