မိုင်းရူပ၊ ဇန်နဝါရီ ၂၁ ရက်၊ နောင်ချို
တအာင်းတပ်မတော်- TNLA ထိန်းချုပ်ထားတဲ့ ရှမ်းမြောက် နောင်ချိုမြို့ကို စစ်ကောင်စီတပ်က ဂျက်လေယာဥ်နဲ့ ဗုံးကြဲတိုက်ခိုက်ခဲ့ရာ အမျိုးသမီး ၁ ဦး သေဆုံးပြီး ၁ ဦး ထိခိုက်ဒဏ်ရာ ရခဲ့တယ်လို့ ရွှေဖီမြေက စုံစမ်းသိရှိရပါတယ်။
ဒီနေ့ ဇန်နဝါရီ ၂၁ ရက် နေ့လယ် ၃ နာရီခန့်မှာ နောင်ချိုမြို့ရှိ ထွေအုပ်ရုံးအနီးကို စစ်တပ်က ဗုံးကြဲတိုက်ခိုက်ရာ အမျိုးသမီး ၁ ဦး သေဆုံးပြီး နောက်ထပ် ၁၇ နှစ်အရွယ် အမျိုးသမီးတစ်ဦး ထိခိုက်ဒဏ်ရာ ရခဲ့ပါတယ်။
“ထွေအုပ်ရုံးနဲ့ အရာရှိရုံးကြားမှာ ကြဲတာ။ ဂျက်နဲ့ ၂ ကြိမ် လာကြဲတာ။ အမျိုးသမီးတစ်ယောက် သေတယ်။ တစ်ယောက်ဒဏ်ရာ ရတယ်” လို့ မြေပြင်အခြေအနေ သိရှိသူတစ်ဦးက ရွှေဖီမြေကို ပြောပါတယ်။
ဒါ့အပြင် စစ်တပ်ဟာ ဂျက်လေယာဥ်နဲ့ ဗုံးကြဲတိုက်ခိုက်ပြီးနောက် ပြင်ဦးလွင်မြို့ကနေ ဟောင်ဝှစ်ဇာ လက်နက်ကြီးနဲ့ ၄ ကြိမ် ပစ်ခတ်တိုက်ခိုက်ခဲ့ပါတယ်။
ပြီးခဲ့တဲ့ ဇန်နဝါရီ ၁၃ ရက်မှာလည်း PSLF/TNLA ထိန်းချုပ်ထားတဲ့ ရှမ်းမြောက် ကျောက်မဲမြို့ကို စစ်တပ်က ဗုံးကြဲတိုက်ခိုက်ခဲ့ပါတယ်။
နောင်ချိုမြို့နယ်မှာရှိတဲ့ စစ်ကောင်စီရဲ့ အမြှောက်တပ် တည်ရှိရာ တောင်းခမ်းရွာနဲ့ နောင်ချို-မန္တလေးတိုင်း ပြင်ဦးလွင်မြို့နယ်ကြား ဂန့်ကော်နဲ့ အုမ္မတီးရွာဘက်မှာ စစ်တပ်နဲ့ TNLA တို့ စစ်ရေး တင်းမာနေပြီး စစ်ကောင်စီတပ်ဘက်က လက်နက်ကြီး ပစ်ခတ်တာအပြင် ဒရုန်းအသုံးပြုပြီး ဗုံးကြဲတိုက်ခိုက်တာတွေလည်း ပြုလုပ်နေပါတယ်။
နောင်ချိုမြို့ကို ပြီးခဲ့တဲ့ ၂၀၂၄ ခုနှစ် ဇူလိုင် ၁၀ ရက်ကတည်းက TNLA နဲ့ ပူးပေါင်းတပ်က တိုက်ခိုက်သိမ်းပိုက်ထားပြီး ၎င်းတို့ရဲ့ အုပ်ချုပ်ရေးယန္တရား လည်ပတ်နေပါတယ်။
