လွေးဇွန်မိုး၊ ဇန်နဝါရီ ၂၇ ရက်၊ ကျောက်မဲ
တအာင်းတပ်မတော်- PSLF/TNLA ထိန်းချုပ်ထားတဲ့ ရှမ်းမြောက် ကျောက်မဲမြို့ကို စစ်ကောင်စီတပ်က လေကြောင်းနဲ့ ဗုံး ထပ်ကြဲခဲ့တယ်လို့ မြေပြင်အခြေအနေသိရှိသူ အမျိုးသားတစ်ဦးက ပြောပါတယ်။
ဒီနေ့ ဇန်နဝါရီ ၂၇ ရက် နေ့လယ် ၂ နာရီခွဲဝန်းကျင်မှာ ကျောက်မဲမြို့ ခရိုင်ရုံးကို ဗုံးကြဲခဲ့တာဖြစ်ပြီး ထိခိုက်မှု အခြေအနေကိုတော့ မသိရသေးဘူးလို့ ဆိုပါတယ်။
ဒေသခံ အမျိုးသားတစ်ဦးက “ဖုန်းလိုင်း ပျက်နေတယ် အခု။ ညစျေး၊ မေတ္တာမွန်ခန်းမ၊ မြို့တော်ခန်းမ၊ အမှတ် ၆ ကျောင်းလို့ သိရတယ်။ မြို့တော်ခန်းမ One Love (ဟိုတယ်)အောက်နား အတည်ပြု” လို့ ပြောပါတယ်။
လက်ရှိမှာတော့ ကျောက်မဲမှာ ဖုန်းလိုင်းတွေ ပြတ်တောက်နေပြီး ဗုံးကြဲတိုက်ခိုက်မှုကြောင့် ထိခိုက်သေဆုံးတာနဲ့ ဒဏ်ရာရသူအခြေအနေ အသေးစိတ်ကိုတော့ ရွှေဖီမြေက ဆက်လက် စုံစမ်းနေဆဲ ဖြစ်ပါတယ်။
ဇန်နဝါရီ ၂၅ ရက် နေ့လယ် ၁ နာရီခွဲဝန်းကျင်မှာလည်း ကျောက်မဲ ပြည်သူ့ဆေးရုံကို စစ်တပ်က ဗုံးကြဲတိုက်ခိုက်ခဲ့လို့ CDM ဆရာမအပါအဝင် ၃ ဦး သေဆုံးပြီး ၂၀ ဦးထက်မနည်း ဒဏ်ရာ ရခဲ့ပါတယ်။
ဒေသခံတွေ ဆေးကုသနေတဲ့ ကျောက်မဲ ပြည်သူ့ဆေးရုံကို ဗုံးကြဲတိုက်ခိုက်တာကို ကန့်ကွက်ရှုတ်ချကြောင်း ကျန်းမာရေး မိသားစု မန္တလေး- MFM၊ တအာင်းပြည် ကျန်းမာရေးကောင်စီ- THC၊ တအာင်းအရပ်ဖက်အဖွဲ့အစည်း- TCSO၊ အမျိုးသား ညီညွတ်ရေးအစိုးရ- NUG၊ TNLA နဲ့ တခြားအဖွဲ့အစည်းတွေက ထုတ်ပြန်ထားပါတယ်။
