လွေးဇွန်မိုး၊ အောက်တိုဘာ ၂၈ ရက်၊ ကျောက်မဲ
စစ်ကောင်စီတပ် ပြန်လည်ထိန်းချုပ်ထားတဲ့ ရှမ်းမြောက် ကျောက်မဲမြို့မှာ တအာင်းတပ်- TNLA နဲ့ဆက်စပ်တယ်ဆိုပြီး အမျိုးသား ၃ ဦးကို စစ်ကောင်စီတပ်က ဖမ်းဆီးထားပြီး နေအိမ်တချို့ကိုလည်း ချိတ်ပိတ်လိုက်တယ်လို့ ဒေသခံတွေဆီက သိရပါတယ်။
ပြီးခဲ့တဲ့ အောက်တိုဘာ ၂၅ ရက်နေ့မှာ TNLA အုပ်ချုပ်စဥ်က ရပ်ကွက်အုပ်ချုပ်ရေးမှူးတာဝန်ယူခဲ့တဲ့ ကျောက်မဲမြို့ ရပ်ကွက် (၁) အုပ်ချုပ်ရေးမှူးနဲ့ ကိုပြူးဆိုသူကို စစ်ကောင်စီတပ်က ဖမ်းဆီးသွားခဲ့တယ်လို့ ဖြစ်စဥ်သိရှိသူဒေသခံတစ်ဦးက ပြောပါတယ်။
“(၁) ရပ်ကွက်နဲ့ (၆) ရပ်ကွက် အုပ်ကြီးတွေနဲ့ (၁) ရပ်ကွက်က ကိုပြူး ဖမ်းခံရတယ်။ မနာလိုတဲ့သူတွေ စရဖ(စစ်ဘက်ရေးရာ လုံခြုံရေးတပ်ဖွဲ့)တွေ ချောက်တွန်းကြပုံပဲ” လို့ ပြောပါတယ်။
အလားတူ ပြီးခဲ့တဲ့ အောက်တိုဘာ ၂၆ ရက် နေ့လည်မှာလည်း ရပ်ကွက် (၆) အုပ်ချုပ်ရေးမှူးကို စစ်ကောင်စီတပ်က လာရောက်ဖမ်းဆီးသွားခဲ့တယ်လို့ အထက်ပါဒေသခံက ပြောပါတယ်။
ဒါ့အပြင် ဖမ်းဆီးသွားတဲ့ အုပ်ချုပ်ရေးမှူးတွေရဲ့ နေအိမ်အပါအဝင် ရပ်ကွက် (၁) ကနေအိမ် ၃ အိမ်၊ ရပ်ကွက် (၃) က ၁ အိမ်၊ ရပ်ကွက် (၆) က ၁ အိမ် စုစုပေါင်း နေအိမ် ၅ အိမ်ကိုလည်း တော်လှန်ရေးတပ်တွေနဲ့ စပ်ဆက်မှုရှိတယ်ဆိုပြီး စစ်ကောင်စီတပ်က ချိတ်ပိတ်သွားတယ်လို့ ဆိုပါတယ်။
အလားတူ စစ်ကောင်စီတပ် ပြန်ထိန်းချုပ်နေတဲ့ နောင်ချိုမြို့မှာလည်း TNLA၊ PDF နဲ့ ဆက်စပ်မှုရှိတယ်ဆိုပြီး နေအိမ်တွေကို လိုက်လံ ချိတ်ပိတ်တာ ရှိနေပြီး ဖမ်းဆီးခံရသူတွေလည်း ရှိနေတယ်လို့ ရွှေဖီမြေက စုံစမ်းသိရှိရပါတယ်။
တအာင်းတပ်မတော်(TNLA)ထိန်းချုပ်ထားတဲ့ ကျောက်မဲမြို့ကို ပြီးခဲ့တဲ့ အောက်တိုဘာ ၁ ရက်မှာ စစ်ကောင်စီတပ်က ပြန်လည်သိမ်းယူခဲ့တာဖြစ်ပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
