ရွှေဖီမြေ၊ ဖေဖော်ဝါရီ ၁၅ ရက်၊ တာချီလိတ်
ရှမ်းအရှေ့ တာချီလိတ်မြို့ ဆန်ဆိုင်း (က)ရပ်ကွက်ထဲ တရားမဝင် အွန်လိုင်း ငွေလိမ်ဂိုဏ်း လုပ်ကိုင်သူ ၁၃ ဦး ဖမ်းဆီးရမိကြောင်း စစ်ကောင်စီက မနေ့ ဖေဖော်ဝါရီ ၁၄ ရက်မှာ ထုတ်ပြန်ထားပါတယ်။
ဖမ်းဆီးခံရသူထဲ ထိုင်းနိုင်ငံသား အမျိုးသား ၇ ဦး၊ မြန်မာနိုင်ငံသား အမျိုးသား ၁ ဦးနဲ့ အမျိုးသမီး ၅ ဦး စုစုပေါင်း ၁၃ ဦးကို ဖေဖော်ဝါရီ ၁၃ ရက်က ဖမ်းဆီးရမိခဲ့တယ်လို့ ဖော်ပြထားပါတယ်။
ထိုင်းနိုင်ငံ ချင်းမိုင်မှာ နေထိုင်တဲ့ ထိုင်းနိုင်ငံသား ဝယ်ဆန်နဲ့ ဇနီးဖြစ်သူ ရန်ကျူးတို့အပြင် ဆက်စပ်တရားခံကိုလည်း ဉပဒေနဲ့အညီ အမြန်ဆုံး ဖမ်းဆီးတရားစွဲနိုင်ဖို့ ဆက်လက် ဆောင်ရွက်နေကြောင်း၊ ထိုင်းနိုင်ငံသားတွေဟာ တာချီလိတ်မြို့သို့ အလည်အပတ်နဲ့ အလုပ်လုပ်ဖို့ လာခဲ့ရာကနေ တရားမဝင် ငွေလိမ်လုပ်ငန်းမှာ ပါဝင်လုပ်ဆောင်ခဲ့ကြတာလို့ ဆိုတယ်။
အွန်လိုင်း ငွေလိမ်လုပ်ငန်း လုပ်ကိုင်သူနဲ့အတူ ငွေလိမ်လုပ်ငန်း လုပ်ကိုင်ရာမှာ အသုံးပြုတဲ့ ဖုန်းမျိုးစုံ ၃၀၀ လုံး၊ ကွန်ပြူတာ ၅၀ လုံးနဲ့ ဘိန်းစာရွက်(အစို) ၁ ကီလိုခန့်စီပါ ၄ ထုပ်၊ ဘိန်းစာရွက်ပြုတ်ရည် ၁ လီတာပါ ၁၀ ဗူးနဲ့ ချောင်းဆိုးပျောက် ဆေးရည် ၃၀ ပုလင်းကို သိမ်းဆည်းရမိခဲ့ပါတယ်။
ပြီးခဲ့တဲ့ ဖေဖော်ဝါရီ ၁၂ ရက်ကလည်း တာချီလိတ် ဆန်ဆိုင်း(က) ရပ်ကွက်မှာရှိတဲ့ ထိုင်းနိုင်ငံသားတွေ ငှားရမ်းနေထိုင်တဲ့ နေအိမ်မှာ ငွေလိမ်လုပ်ငန်းလုပ်သူ အမျိုးသား ၁၁ ဦးနဲ့ အမျိုးသမီး ၅ ဦး စုစုပေါင်း ၁၆ ဦးကို ဖမ်းဆီးခဲ့ပြီး ငွေလိမ်လုပ်ငန်း လုပ်ကိုင်ရာမှာ အသုံးပြုတဲ့ Laptop ၆၁ လုံး၊ Flat Desktop ၃၂၉ လုံးနဲ့ System (CPU) ၉၀ လုံး၊ ဖုန်းမျိုးစုံ ၉၀ လုံး၊ လိုင်စင်မဲ့ မော်တော်ယာဉ် ၂ စီးနဲ့ ဆက်စပ်ပစ္စည်းလည်း ဖမ်းဆီးရမိခဲ့တယ်လို့ ဖော်ပြထားပါတယ်။
