မိုင်းရူပ၊ ဇန်နဝါရီ ၁၄ ရက်၊ နောင်ချို
ရှမ်းမြောက် နောင်ချိုမြို့နယ် တောင်းခမ်းကျေးရွာရှိ စစ်ကောင်စီရဲ့ အမြှောက်တပ်စခန်းတွေကို တအာင်းတပ်မတော်- TNLA က ဝိုင်းရံပိတ်ဆို့ထားပြီး စစ်တပ်က လေကြောင်း အသုံးပြုပြီးတော့ လက်နက်ခဲယမ်း ပို့ဆောင်နေတယ်လို့ ရွှေဖီမြေက စုံစမ်းသိရှိရပါတယ်။
ဒီရက်ပိုင်းအတွင်း မြေပြင်တိုက်ပွဲ ငြိမ်သက်နေပြီး အမြှောက်တပ်စခန်းကို TNLA က ဝိုင်းရံပိတ်ဆို့ထားကာ တစ်ဖက်နဲ့တစ်ဖက် လက်နက်ကြီးနဲ့ ပစ်ခတ်နေတယ်လို့ ရှေ့တန်း စစ်မြေပြင်မှာ ရှိနေသူတစ်ဦးက ရွှေဖီမြေကို ပြောပါတယ်။
“လက်နက်ကြီးနဲ့ အပြန်အလှန် ပစ်ခတ်တာတော့ ရှိတယ်။ စစ်ကောင်စီ ထိုးလာရင်တော့ အချိန်မရွေး တိုက်ပွဲ ပြန်ဖြစ်နိုင်တယ်။ လက်ရှိ အခြေအနေက စစ်ကောင်စီတပ်စခန်းတွေကို ဝိုင်းထားတယ်”
ပြီးခဲ့တဲ့ ဇန်နဝါရီ ၁၁ ရက်မှာ စစ်တပ်ဟာ တောင်းခမ်းရှိ အမြှောက်တပ် ၉၀၂ နဲ့ ၂၀၆ တပ်စခန်းမှာ Y-12 လေယာဉ်နဲ့ လက်နက်ခဲယမ်း လာရောက် ပို့ဆောင်ခဲ့တယ်လို့ သူက ဆက်ပြောပါတယ်။
တောင်းခမ်းရွာမှာ စစ်ကောင်စီရဲ့ အမြှောက်တပ်စခန်း ကွပ်ကဲမှုဌာနချုပ်အပါအဝင် အမြှောက်တပ်စခန်းတွေဖြစ်တဲ့ ၃၅၄၊ ၂၀၆ နဲ့ ၄၀၆ တပ်တွေ အခြေချ တပ်စွဲထားပြီး တောင်းခမ်းမှာ စစ်တပ်နဲ့ TNLA တို့အကြား တိုက်ပွဲ ပြင်းထန်နေတာ ၄ လကျော်ကြာ ရှိနေပြီ ဖြစ်ပါတယ်။
တောင်းခမ်းဘက် စစ်ကူလာတဲ့ စစ်ကောင်စီ စစ်ကြောင်းကို ဟန့်တားတိုက်ခိုက်နေတဲ့ ဓနုတပ်တော်- DPLA နဲ့ စစ်တပ်ကလည်း ဒီရက်ပိုင်းအတွင်း ရှမ်းတောင် ရပ်စောက်မြို့နယ် ကျောက်ဂူဒေသအနီးတစ်ဝိုက်မှာ တိုက်ပွဲ ဆက်ဖြစ်နေပါတယ်။
တောင်းခမ်းနဲ့ မိုင် ၂၀ ခန့် ကွာဝေးတဲ့ နောင်ချိုမြို့ကိုတော့ ပြီးခဲ့တဲ့ ဇူလိုင် ၁၀ ရက်ကတည်းက TNLA နဲ့ ပူးပေါင်းတပ်တွေက တိုက်ခိုက်သိမ်းပိုက်နိုင်ခဲ့ပါတယ်။
