ရွှေဖီမြေ၊ ဧပြီ ၄ ရက်၊ လားရှိုး
ကိုးကန့်တပ်မတော်- MNDAA ဟာ ၎င်းတို့ ထိန်းချုပ်ထားတဲ့ ရှမ်းမြောက် လားရှိုးမြို့ကနေ ဆုတ်ခွာပြီး စစ်ကောင်စီတပ်ကို ပြန်လည် အုပ်ချုပ်စေမှာ ဖြစ်တယ်လို့ ဒေသခံတွေက ရွှေဖီမြေကို ပြောပါတယ်။
လားရှိုးမြို့မှာရှိတဲ့ ရပ်ကွက်တချို့ကို အစည်းအဝေး ပြုလုပ်ခဲ့ပြီး စစ်တပ်က လားရှိုးမြို့မှာရှိတဲ့ ဌာနဆိုင်ရာအဖွဲ့တချို့ကို ပြန်လည် အုပ်ချုပ်သွားမှာဆိုပြီး အမျိုးသားတစ်ဦးက ပြောပါတယ်။
“လမကုန်ခင် ဌာနဆိုင်ရာအဖွဲ့တချို့ ပြန်ဝင်လိမ့်မယ်။ စကစဖက်ကပေါ့။ စစ်ဖက်ဆိုင်ရာတော့ မဝင်သေးဘူး။ လက်ရှိ မြို့ထဲက တာဝန်ထမ်းဆောင်သူတွေက မဖြစ်မနေ မြို့က ခွာရမယ်။ လားရှိုးမှာ စစ်ဦးစီးနဲ့တပ်ဖွဲ့ဝင်၊ ရဲဌာန၊ ဆက်ဆံရေးရုံးတော့ ကျန်ခဲ့မယ်။ စကစကို ပေးရမှာက မြို့ပေါ် ၁၂ ရပ်ကွက်ပေါ့။ ပြည်သူတွေကို ပြောချင်တာက ကြိုပြင်ဆင်ထားဖို့ပါ။ ကြားထဲမှာ အခြေအနေ အများကြီး ပြောင်းနိုင်ပေမဲ့ ကြိုတင် ပြင်ဆင်စေချင်လို့ပါ”
တရုတ်ရဲ့ ကြားဝင်ညှိနှိုင်းမှုအရ MNDAA ဟာ လားရှိုးမြို့ကို စစ်ကောင်စီထံ ပြန်လည်လွှဲပြောင်းပေးမှာ ဖြစ်တယ်လို့ နောက်ထပ်အမျိုးသားတစ်ဦးက ပြောပါတယ်။
“အုပ်ချုပ်ရေးကတော့ စကစနဲ့ ပူးတွဲကိုင်တွယ်မယ်လို့ သိရပါတယ်။ စကစ ပြန်ဝင်လာရင် စစ်မှုထမ်း ကောက်လိမ့်မယ်။ မဆုတ်ပေးရင် လေကြောင်း တိုက်ခိုက်မှု လုပ်မယ်လို့ စကစဘက်က ခြိမ်းခြောက်တယ်။ စီးပွားရေးနဲ့ ကုန်သွယ်ရေးဂိတ်တွေပိတ်မယ်လို့ တရုတ်ဘက်က ဖိအားပေးတယ်။ ကျန်တဲ့ ဖိအားလည်း အများကြီးဘဲ”
ပြီးခဲ့တဲ့ ဇန်နဝါရီ ၁၅ ရက်က စစ်တပ်နဲ့ MNDAA တို့ ကူမင်းမြို့မှာ တရုတ်ရဲ့ ကြားဝင်ညှိနှိုင်းမှုအရ တွေ့ဆုံဆွေးနွေးခဲ့ကြပြီး နှစ်ဖက် အပစ်ရပ် သဘောတူညီချက်စာချုပ်ကို တရားဝင် လက်မှတ် ရေးထိုးခဲ့ပါတယ်။
လားရှိုးမြို့ကို ပြီးခဲ့တဲ့ ၂၀၂၄ ဩဂုတ် ၃ ရက်မှာ MNDAA နဲ့ ပူးပေါင်းတပ်တွေက တိုက်ခိုက်သိမ်းပိုက်ခဲ့တာပဲ ဖြစ်ပါတယ်။
