မိုင်းရူပ၊ စက်တင်ဘာ ၂၂ ရက်၊ ကျောက်မဲ
တအာင်းတပ် ထိန်းချုပ်ထားတဲ့ ကျောက်မဲမြို့ကို ဦးတည်ပြီး ထိုးစစ်ဆင် တိုက်ခိုက်နေတဲ့ စစ်ကောင်စီတပ်နဲ့ တအာင်းတပ်မတော်- TNLA အကြား တိုက်ပွဲ ဆက်လက် ပြင်းထန်နေပါတယ်။
တိုက်ပွဲဟာ မက်မန်းကုန်သာ၊ ခိုက်တုန်ဟုန်းနဲ့ နားအိုက်ခန့်ရွာအနီးမှာ ဖြစ်ပွားနေပြီး စစ်တပ်နဲ့ TNLA အကြား အပြန်အလှန် ထိုးစစ်ဆင် တိုက်ခိုက်နေတယ်လို့ ရှေ့တန်း စစ်မြေပြင်မှာ ရှိနေသူတစ်ဦးက ရွှေဖီမြေကို ပြောပါတယ်။
“အခု စစ်ကောင်စီက ခိုက်တုန်ဟုန်းရွာအနီးက မက်မန်းကုန်သာရွာဘက်လည်း ရောက်နေတယ်။ အခုတိုက်ပွဲက ခိုက်တုန်ဟုန်းနဲ့ နားအိုက်ခန့်ရွာကြားမှာ ဖြစ်နေတယ်”
ဒါ့အပြင် စစ်တပ်ဘက်က ဂုတ်တွင်းအနီး နောင်ပြစ်ရွာအပါအဝင် ကောင်းမူလွယ်ရွာတွေကို ထိန်းချုပ်လိုက်တာကြောင့် ဂုတ်တွင်း-နောင်ပိန်လမ်းပိုင်းတစ်ခုလုံးကို စစ်ကောင်စီတပ်ဘက်က ထိန်းချုပ်နိုင်ခဲ့တာပဲ ဖြစ်ပါတယ်။
စစ်တပ်ရဲ့ ထိုးစစ်ကြောင့် ကျောက်မဲမြို့နယ်ထဲ စစ်ကောင်စီတပ်နဲ့ TNLA အကြား တိုက်ပွဲ ပြင်းထန်နေတာ တစ်လကျော် ကြာရှိနေပြီး TNLA ဘက်ကလည်း ကျောက်မဲမြို့ လက်မလွှတ်ရရေး ဆက်လက် ခုခံနေဆဲ ဖြစ်ပါတယ်။
စစ်တပ်ဟာ ကျောက်မဲနဲ့ သီပေါမြို့နယ်ကို ရွေးကောက်ပွဲ ကျင်းပမယ့် နယ်မြေထဲ ထည့်သွင်းထားပြီး ရွေးကောက်ပွဲ မတိုင်ခင် အဲဒီမြို့နယ် ၂ ခုကို ထိန်းချုပ်ဖို့ ထိုးစစ်ဆင် တိုက်ခိုက်နေတာ ဖြစ်ပါတယ်။
ဒါ့အပြင် စစ်တပ်ဘက်က ကျောက်မဲမြို့ပေါ် လားရှိုးကနေ ထောက်လှမ်းရေးအဖွဲ့တွေ စေလွှတ်ထားပြီး TNLA ဘက်က လိုက်လံ ဖမ်းဆီးတာတွေ ရှိနေပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှု နားဆင်နိုင်ပါတယ်။
