မိုင်းရူပ၊ ဧပြီ ၂၅ ရက်၊ နောင်ချို
စစ်ကောင်စီတပ်က ထိုးစစ်ဆင် တိုက်ခိုက်နေတာကြောင့် ရှမ်းမြောက် နောင်ချိုမြို့နယ် တောင်းခမ်းရွာအနီးတစ်ဝိုက်မှာ စစ်တပ်နဲ့ တအာင်းတပ်မတော်- TNLA တို့ တိုက်ပွဲ ဆက်လက် ပြင်းထန်နေတယ်လို့ ရှေ့တန်းစစ်မြေပြင်မှာ ရှိနေသူတွေက ရွှေဖီမြေကို ပြောပါတယ်။
စစ်ကောင်စီရဲ့ အမြှောက်တပ်စခန်း ကွပ်ကဲမှုဌာနချုပ် ၉၀၂ တပ်စခန်းမှာ တိုက်ပွဲပြင်းထန်နေသလို နောင်ချိုမြို့နယ် မဲပုတ်ရွာဘက် ထိုးစစ် ဆင်လာတဲ့ စစ်တပ်နဲ့ TNLA တိုက်ပွဲ ပြင်းထန်နေတာပါ။
“တိုက်ပွဲက ပြင်းထန်နေတယ်။ မနေ့လည်း တစ်နေကုန်ပဲ။ ဒီနေ့လည်း တိုက်ပွဲ ပြင်းထန်နေတယ်” လို့ ရှေ့တန်း စစ်မြေပြင်မှာ ရှိနေသူတစ်ဦးက ရွှေဖီမြေကို ပြောပါတယ်။
မဲပုတ်ရွာကနေ ထိုးစစ် ဆင်လာတဲ့ စစ်တပ်ဟာ နောင်လင်ရွာအထိ ရောက်လာပြီလို့ နောင်ချိုဒေသခံတစ်ဦးက ရွှေဖီမြေကို ပြောပါတယ်။
“စစ်ကောင်စီတွေ နောင်လင်အထိ ရောက်လာပြီ။ နောင်လင်က နောင်ချိုမြို့နဲ့ သိပ်မဝေးတော့ဘူး”
စစ်ကောင်စီရဲ့ ဝါဒဖြန့် တယ်လီဂရမ်တွေမှာတော့ စစ်တပ်က နောင်လင်ရွာရှိ TNLA တပ်စခန်းကို သိမ်းပိုက်နိုင်ပြီလို့ ဝါဒဖြန့် ရေးသားနေကြပါတယ်။
စစ်တပ်ဟာ လက်လွှတ်ထားရတဲ့ နောင်ချိုမြို့ကို ပြန်ထိန်းချုပ်နိုင်ဖို့ အုမ္မတီး၊ ကံကြီးနဲ့ နောင်ချိုလေး-မဲပုတ် စတဲ့စစ်ကြောင်း ၃ ကြောင်းခွဲပြီး TNLA ကို ထိုးစစ်ဆင် တိုက်ခိုက်နေတာ တွေ့ရပါတယ်။
မနေ့ ဧပြီ ၂၄ ရက် ညပိုင်းမှာလည်း စစ်တပ်ဟာ TNLA ထိန်းချုပ်ထားတဲ့ နောင်ချိုမြို့အနီးရှိ ကျောက်ကြမ်း၊ အုမ္မခါးနဲ့ အုမ္မတီးရွာထဲ စစ်တပ်က Y-12 လေယာဥ် အသုံးပြုပြီး ဗုံး ၃၀ နီးပါး ကြဲချတိုက်ခိုက်ခဲ့ပါတယ်။
တစ်ဖက်မှာလည်း စစ်ကောင်စီနဲ့ ကိုးကန့်တပ်အကြား အပစ်ရပ်ဖို့ သဘောတူပြီးနောက် တရုတ်ရဲ့ ကြားဝင်စေ့စပ်မှုကြောင့် စစ်ကောင်စီနဲ့ TNLA တွေ့ဆုံမယ်လို့ သတင်း ထွက်ပေါ်နေပြီး ရွှေဖီမြေက သီးခြား အတည်ပြုနိုင်ခြင်း မရှိသေးပါဘူး။
