မိုင်းရူပ၊ ဇူလိုင် ၂၃ ရက်၊ ကျောက်မဲ
စစ်ကောင်စီတပ်ရဲ့ မကြာခဏ ဗုံးကြဲတိုက်ခိုက်မှုကြောင့် တအာင်းတပ်မတော်- PSLF/TNLA ထိန်းချုပ်ထားတဲ့ ကျောက်မဲနဲ့ သီပေါမြို့ပေါ်က ဒေသခံတချို့ဟာ ထွက်ပြေးတိမ်းရှောင်နေကြတာ ရှိတယ်လို့ ဒေသခံတွေက ပြောပါတယ်။
ကျောက်မဲနဲ့ သီပေါမြို့ပေါ် မနက်ခင်းအစောပိုင်းမှာ မြို့တွင်း ဈေးဝယ်သူတချို့သာ တွေ့ရပြီး ညနေပိုင်းမှာတော့ မြို့တွင်းမှာ တိတ်ဆိတ်နေတယ်လို့ သီပေါဒေသခံတစ်ဦးက ရွှေဖီမြေကို ပြောပါတယ်။
“သီပေါမှာက ကိုးကန့်တပ် ထိန်းချုပ်ထားတဲ့ သီပေါတံတားဘက်ခြမ်းမှာ ရှောင်တာရှိတယ်။ အဲမှာရှောင်တဲ့သူက မနက်ဆို သီပေါဘက် ပြန်လာ။ ညဆို ကိုးကန့်ဘက်ခြမ်း သွားအိပ်တယ်။ လားရှိုး၊ တောင်ကြီးဘက်လည်း ရှောင်တာရှိတယ်”
စစ်တပ်ဟာ ပြီးခဲ့တဲ့ ဇွန်လကုန်ကစပြီး သီပေါနဲ့ ကျောက်မဲမြို့ပေါ် လေယာဉ်နဲ့ ဗုံးကြဲတိုက်ခိုက်တာတွေ မကြာခဏ ပြုလုပ်နေတာပဲ ဖြစ်ပါတယ်။
မနေ့ ဇူလိုင် ၂၂ ရက် ညသန်းခေါင်ယံ ၁၂ နာရီဝန်းကျင်မှာလည်း စစ်တပ်က သီပေါမြို့အနီးရှိ စစ်ကောင်စီရဲ့ ခြေလျင်တပ်ရင်း ၂၃ တပ်စခန်းဟောင်းထဲ ပေါင် ၅၀၀ ဗုံး ကြဲချတိုက်ခိုက်ခဲ့ပါတယ်။
ရွှေဖီမြေက ရရှိထားတဲ့ စာရင်းအရ ၂ ပတ်ကျော်အတွင်း သီပေါမြို့ပေါ် လေကြောင်း တိုက်ခိုက်မှုကြောင့် ဒေသခံ ၂ ဦး သေဆုံးပြီး ၅ ဦး ဒဏ်ရာ ရရှိခဲ့ပါတယ်။
ဒါ့အပြင် ကျောက်မဲမြို့မှာလည်း ပြီးခဲ့တဲ့ ဇွန်လကုန်ကနေ ဇူလိုင် ဒုတိယပတ်အထိ လေကြောင်း တိုက်ခိုက်မှုကြောင့် သေဆုံးသူနဲ့ ဒဏ်ရာရသူ ၅၀ နီးပါး ရှိခဲ့ပါတယ်။
တစ်ဖက်မှာလည်း နောင်ချိုမြို့ကို စစ်တပ် ပြန်ထိန်းချုပ်ပြီးနောက် ကျောက်မဲနဲ့ သီပေါကို ပြန်လည် ထိုးစစ် ဆင်လာနိုင်တယ်ဆိုတဲ့ သတင်းကြောင့် လူထုတွေကြား စိုးရိမ်မှု ရှိနေပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
