လွေးလာဝ်ဇာရ်၊ ဩဂုတ် ၁၃ ရက်၊ နောင်ချို
ရှမ်းမြောက် နောင်ချိုမြို့နဲ့ တအာင်းတပ် TNLA ထိန်းချုပ်ထားတဲ့ ကျောက်မဲမြို့နယ်ကြားက ပင်ပေါကျေးရွာမှာ စစ်ကောင်စီတပ်က လေကြောင်းကနေ ဗုံးကြဲတိုက်ခိုက်မှုကြောင့် နေအိမ်တချို့ ထိခိုက်ပျက်စီးခဲ့တယ်လို့ ဖြစ်စဉ်သိရှိသူတစ်ဦးက ရွှေဖီမြေကို ပြောပါတယ်။
ဒီနေ့ ဩဂုတ် ၁၃ ရက် မနက်အစောပိုင်း ၁၂ နာရီခွဲအကျော်မှာ ဂျက်လေယာဉ်နဲ့ ဗုံး ၂ လုံး လာရောက်ကြဲချခဲ့တာကြောင့် နေအိမ် ၂ လုံး ထိခိုက်ပျက်စီးခဲ့ပြီး လူအထိအခိုက်တော့ မရှိဘူးလို့ ပြောပါတယ်။
ဖြစ်စဉ်သိရှိသူတစ်ဦးက “မနေ့ည လေယာဉ်နဲ့ ဗုံးနှစ်လုံး လာကြဲတာ။ နေအိမ် ၂ လုံးက ပျက်စီးတယ်။ ကျန်တဲ့အိမ်တွေက ပေါက်ကွဲအားကြောင့် တံခါးပေါက်တို့ ဘာတို့ ပျက်စီးတာတော့ ရှိတယ်” လို့ ပြောပါတယ်။
ပြီးခဲ့တဲ့ ဩဂုတ် ၁ ရက်ကနေ ဒီနေ့ ဩဂုတ် ၁၃ ရက်အထိ ရွှေဖီမြေ ရရှိထားတဲ့စာရင်းအရ စစ်ကောင်စီတပ်ရဲ့ လေကြောင်းတိုက်ခိုက်မှုကြောင့် သီပေါ၊ ကျောက်မဲနဲ့ မိုးကုတ်က ဒေသခံ ၁၈ ဦး သေဆုံးခဲ့ပြီး ၁၆ ဦး ဒဏ်ရာရခဲ့ပါတယ်။
၁၀၂၇ စစ်ဆင်ရေးအတွင်း TNLA နဲ့ ပူးပေါင်းတပ်တွေ ထိန်းချုပ်ထားတဲ့ နောင်ချိုမြို့ကို ၁ နှစ်ကျော်အကြာ ပြီးခဲ့တဲ့ ဇူလိုင် ၁၆ ရက်မှာ စစ်ကောင်စီတပ်ထံ ပြန်လည်လက်လွှတ်ခဲ့ရတာ ဖြစ်ပါတယ်။
နောင်ချိုမြို့ကို စစ်တပ်ထံ ပြန်လည်လက်လွှတ်ခဲ့ရပြီးနောက် မိုးကုတ်ဘက်ကိုလည်း စစ်ကောင်စီတပ်က ပြန်လည်ထိုးစစ်ဆင်လာနေတာ ဖြစ်ပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
