ရွှေဖီမြေ၊ ဧပြီ ၁၂ ရက်၊ လားရှိုး
နေအိမ် ပျက်စီးသွားတဲ့ လားရှိုးမြို့က နေအိမ်တွေအတွက် ပြီးခဲ့တဲ့ ဧပြီ ၇ ရက်က ကိုးကန့်တပ်အနေနဲ့ နေအိမ် ၁ လုံးကို သိန်း ၅၀ ထောက်ပံ့ပေးခဲ့ရာ အဲဒီထောက်ပံ့ငွေကို ရာအိမ်မှူးတချို့က ဖြတ်စားခဲ့တယ်လို့ ကိုယ်တိုင် ကြုံတွေ့ခဲ့ရသူတွေက ရွှေဖီမြေကို ပြောပါတယ်။
ရပ်ကွက်(၁၀) မြို့ဝမ်ရပ်ကွက်ရှိ နေအိမ် ၁ အိမ်ကို ရာအိမ်မှူးဖြစ်သူ ဦးအိုက်ဆမ်က ၂၅ သိန်းပဲ ပေးပြီး ၂၅ သိန်းကို ယူဆောင်သွားခဲ့တယ်လို့ ဆိုပါတယ်။
“ငွေပေးတဲ့အချိန်က အဲအိမ်ရှင်က မရှိထားဘူး။ သူက ကိုယ်စားအဖြစ် သွားယူပေးခဲ့တာ။ အိမ်ရှင် ပြန်လာတော့ ၂၅ သိန်းပဲ ပေးတော့တယ်။ ဟိုအိမ်ရှင်ကလည်း ဘာမှ ပြန်မပြောရဲဘူး။ ဒီနေ့အထိပဲ”
ဦးအိုက်ဆမ်ဟာ စစ်ကောင်စီ အုပ်ချုပ်စဉ်ကတည်းက ရပ်ကွက်အုပ်ချုပ်ရေးမှူးနဲ့ ပူးပေါင်းပြီး ဆန္ဒပြသူနဲ့ CDM တွေကို ဖမ်းတာတွေ ပြုလုပ်ခဲ့ကာ ကိုးကန့်တပ်လက်ထက်မှာလည်း ရာအိမ်မှူးအဖြစ် ထပ်မံ ခန့်အပ်ခံရသူ ဖြစ်ပါတယ်။
“သူ့ကို ရပ်ကွက်ထဲကလူတွေ ကြောက်ကြတယ်။ မပြောရဲကြဘူး။ ပြီးတော့ နောက် ၂ အိမ် ရှိသေးတယ်။ အဲ ၂ အိမ်ကတော့ ၄၅ သိန်း ရကြတယ်။ ဘာဖိုးလဲဆိုတာ့ ပင်ပန်းခပေါ့။ အခြား နေလို့မရတဲ့ အိမ်တွေလည်း ရှိတယ်။ စာရင်းထဲ ပါမသွားဘူး။ အဲဒါကတော့ သက်သက်ပေါ့။ အခု ရာအိမ်မှူးက ကိုးကန့်တွေ ထွက်သွားရင်တောင် ပိုကြောက်ရမယ့်သဘော ရှိတယ်” ဆိုပြီး ၎င်းက ဆက်ပြောပါတယ်။
ကိုးကန့်တပ်ဟာ နေအိမ် ပျက်စီးသွားတဲ့ လားရှိုးမြို့ထဲက နေအိမ် ၃၀၉ အိမ်အတွက် ထောက်ပံ့ပေးခဲ့တာဖြစ်ပြီး စာရင်းပါပြီး ငွေမရသေးသူတွေအနေနဲ့ ရပ်ကွက်(၁) အုပ်ချုပ်ရေးမှူးရုံးမှာ ဧပြီ ၁၆ ရက်အထိ လာရောက် ထုတ်ယူလို့ရကြောင်း ပြောဆိုထားပါတယ်။
လာမယ့် ဧပြီ ၂၁ ရက် နောက်ဆုံးထားပြီး လားရှိုးမြို့ကို စစ်ကောင်စီထံ လွှဲပြောင်းပေးမယ်လို့ သတင်းတွေ ထွက်ပေါ်နေပေမဲ့ ကိုးကန့်တပ်နဲ့ စစ်ကောင်စီတို့ တရားဝင်ထုတ်ပြန်တာ မရှိသေးပါဘူး။
