ရွှေဖီမြေ၊ ဇွန်လ ၁၀ ရက်
မကွေးတိုင်း ပခုက္ကူခရိုင် မြစ်ခြေမြို့ရဲစခန်းကို ပခုက္ကူခရိုင် ပြည်သူ့ကာကွယ်ရေးတပ်ဖွဲ့နဲ့ တော်လှန်ရေးပူပေါင်းတပ်တွေက ဝင်ရောက်တိုက်ခိုက် သိမ်းပိုက်နိုင်ခဲ့တယ်လို့ သိရပါတယ်။
အဲဒီမြစ်ခြေရဲစခန်းကို ဒီနေ့ ဇွန် ၁၀ ရက် မနက် ၄ နာရီမှာ မကွေးတိုင်းစစ်ဌာန ကွပ်ကဲမှုအောက်ရှိ ပခုက္ကူခရိုင်စစ်ဌာနရဲ့ ဦးဆောင်ကွပ်ကဲမှုနဲ့ စတင်ဝင်ရောက်တိုက်ခိုက်ခဲ့ရာ မနက် ၅ နာရီမှာတော့ အပြီးသတ် တိုက်ခိုက်သိမ်းပိုက်နိုင်ခဲ့တာလို့ ဆိုပါတယ်။
အဆိုပါ တိုက်ပွဲအတွင်း စစ်ကောင်စီတပ်ရဲ့ တပ်ဖွဲ့ဝင် ၂ ဦး သေဆုံးပြီး ၁၄ ဦး အရှင်ဖမ်းမိခဲ့တယ်လို့ ၎င်းတို့ရဲ့ ထုတ်ပြန်ချက်အရ သိရပါတယ်။
ဖမ်းဆီးရမိတဲ့ စစ်သုံ့ပန်းတွေကို နိုင်ငံတကာ စစ်ဥပဒေတွေနဲ့အညီ ထိန်းသိမ်းထားရှိပြီး စစ်ရာဇဝတ်မှု ကျူးလွန်သူတွေကိုလည်း စစ်ဘက်ဆိုင်ရာဥပဒေနဲ့အညီ စိစစ်ဖော်ထုတ် အရေးယူ သွားမယ်လို့ ဆိုထားပါတယ်။
အဲဒီစခန်းသိမ်းတိုက်ပွဲအတွင်း G 3 ၁၈ လက်၊ 79 ၁ လက်၊ ခြောက်လုံးပြူး ၂ လက်၊ ၆၀ မမ ကွန်မန်ဒိုစိန်ပြောင်း ၁ လက်၊ G 3 ကျည်ဘောက် ၂၇ ဘောက်၊ လက်လုပ် လေသေနတ် ၁ လက်၊ ကျည်ကာ ဦးထုပ် ၇ လုံး၊ G 3 ကျည် ၁၉၀၈ တောင့် သိမ်းဆည်းနိုင်ခဲ့ကြောင်းလည်း ထုတ်ပြန်ဖော်ပြထားတယ်။
စစ်ကောင်စီတပ်ဟာ ပြီးခဲ့တဲ့ မေလ ၁၀ ရက်ကနေ ဇွန် ၂ ရက်အထိ မြစ်ခြေမြို့ရှိ နေအိမ်ပေါင်း ၁ ထောင်ကျော်ကို မီးရှို့ဖျက်ဆီးခဲ့ပြီး ဒေသခံ ၂၄ ဦးကိုလည်း မီးရှို့သတ်ဖြတ်ခဲ့တယ်လို့ သတင်းတွေရဲ့ ဖော်ပြချက်အရ သိရပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
