မိုင်းပန်ပျော်၊ မတ်လ ၂၅ ရက်၊ လားရှိုး
ကိုးကန့်တပ်မတော် ထိန်းချုပ်ထားတဲ့ ရှမ်းမြောက် လားရှိုး ပြည်သူ့ဆေးရုံမှာ လူနာတွေဟာ တစ်ညကို ၁ သောင်းခွဲကနေ ၅ သောင်းအထိ ပေးနေရတာကြောင့် ဒေသခံတွေ အခက်အခဲ ကြုံနေရပါတယ်။
လားရှိုး ပြည်သူ့ဆေးရုံမှာ ညအိပ်ပြီး ကုသမယ်ဆိုရင် အများသုံးကုတင်အတွက် တစ်ည ၁ သောင်းခွဲ၊ သီးသန့်အခန်းတွေကတော့ တစ်ည ၅ သောင်း ပေးရတာကြောင့် ဒေသခံတချို့က ငွေ မတတ်နိုင်တာကြောင့် ကိုယ့်အိမ်မှာဘဲ ကုသရတာ ရှိတယ်လို့ အမည်မဖော်လိုတဲ့ အမျိုးသားတစ်ဦးက ရွှေဖီမြေကို ပြောပါတယ်။
“ပြောမယ်ဆိုရင်တော့ ဟိုတုန်းကထက်စာရင် ပိုက်ဆံ တော်တော်ကုန်တာပေါ့လေ။ အခုသူတို့က ညအိပ်ခ ၁ သောင်းခွဲအထိ ယူတယ်ပေါ့နော်။ ရှယ်ခန်းဆိုရင် ၅ သောင်း ရိုးရိုးကုတင် အများသုံး ကုတင်ဆိုရင် ၁ သောင်းခွဲပေါ့။ မတတ်နိုင်တဲ့လူတွေ ရှိတာပေါ့။ ရောဂါဖြစ်ပေမဲ့ ကိုယ့်ဟာအိမ်မှာပဲ ကြိတ်မိတ်ပြီး ကုနေတဲ့ဟာလည်း ရှိတယ်”
လားရှိုးက ဒေသခံတွေဟာ အလုပ်အကိုင် ရှားပါးမှု ကြုံနေရတာကြောင့် ငွေကြေး အခက်အခဲ ကြုံနေရချိန်မှာ ဆေးရုံစရိတ် တတ်နိုင်သလောက် လျှော့ပေးစေချင်တယ်လို့ ၎င်းက ဆက်ပြောပါတယ်။
လားရှိုး ပြည်သူ့ဆေးရုံနဲ့ နီးစပ်သူတစ်ဦးကတော့ တစ်ညအိပ် ၁ သောင်းခွဲဆိုတာ ညအိပ်ခ မဟုတ်ဘဲ ရောဂါ လာစစ်ဆေးပေးတဲ့ ဆရာဝန်နဲ့ သန့်ရှင်းရေးအတွက် ကောက်တာဖြစ်တယ်လို့ ပြောဆိုပါတယ်။
“တစ်သောင်းခွဲဆိုတာက ဆရာဝန်တွေ လိုက်ကြည့်ပေးတဲ့တာက အထူးကုဆရာဝန်တွေ ပါတယ်။ ပြီးတော့ သန့်ရှင်းရေးခတွေ အကုန်လုံးမှ တစ်ရက် တစ်သောင်းခွဲ တောင်းတာ”
သီးသန့်ခန်း တစ်ခန်းအတွက် တစ်ည ၅ သောင်းက ဘာကြောင့် ပေးရလဲဆိုတာကိုတော့ ၎င်းအနေနဲ့လည်း အတိအကျ မသိသေးဘူးလို့ ပြောပါတယ်။
လားရှိုး ပြည်သူ့ဆေးရုံကို ပြီးခဲ့တဲ့ ၂ဝ၂၄ ဩဂုတ် ၁၄ ရက်မှာ စတင်ဖွင့်လှစ်ခဲ့တာဖြစ်ပြီး ၈ လအကြာမှာ အခုလို အခြေအနေ ကြုံလာရတာပဲ ဖြစ်ပါတယ်။
