မိုင်းရူပ၊ ဒီဇင်ဘာ ၂၇ ရက်၊ လားရှိုး
ရှမ်းမြောက် လားရှိုးမြို့မှာ စစ်ကောင်စီ ဦးဆောင် ကျင်းပမယ့် ရွေးကောက်ပွဲအတွင်း မဖြစ်မနေမဲလာပေးဖို့ မြို့ခံတွေ ဖိအားပေးခံနေရတယ်လလို့ မြို့ခံတွေက ရွှေဖီမြေကို ပြောပါတယ်။
ဒီနေ့ ဒီဇင်ဘာ ၂၇ ရက်မှာ လားရှိုးမြို့အတွင်း စစ်ကောင်စီရဲ့ အုပ်ချုပ်ရေးအဖွဲ့တွေက မဲဆန္ဒရှင် သက်သေခံလက်မှတ်တွေကို လိုက်လံဝေပေးနေပြီး မနက်ဖြန် ဒီဇင်ဘာ ၂၈ ရက်မှာ မဖြစ်မနေမဲလာပေးဖို့ ပြောသွားတယ်လို့ လားရှိုးမြို့ခံအမျိုးသားတစ်ဦးက ရွှေဖီမြေကို ပြောပါတယ်။
” မဖြစ်မနေ မဲလာထည့်ရမယ်။ မထည့်လို့မရဘူးတဲ့။ မဲပေးရမယ့် ကဒ်ကို တစ်အိမ်ဝင်တစ်အိမ်ထွက် လိုက်ပေးနေတယ်။ ကျနော်တို့ မဲထည့်ပြီးရင် မဲထည့်ပြီးကြောင်း ထုထားတဲ့တံဆိပ်တုံးကို နယ်မြေမှူးဆီ ပြန်လာပေးရမယ်။ မဲလည်းခိုင်းချင်သေးတယ်။ ဘာမှလည်း လွတ်လပ်ခွင့်မပေးဘူး” လို့ ကိုယ်တိုင်ကြုံတွေ့ခဲ့ရတဲ့လားရှိုးမြို့ခံအမျိုးသားတစ်ဦးက ရွှေဖီမြေကို ပြောပါတယ်။
ရွေးကောက်ပွဲမဲသွားသူတွေအနေနဲ့ ဖုန်းအပါအဝင် အန္တရာယ်ဖြစ်စေနိုင်တဲ့ ပစ္စည်းတွေယူမသွားဖို့ စစ်ကောင်စီရဲ့ အုပ်ချုပ်ရေးအဖွဲ့က ပြောဆိုသွားတယ်လို့ ၎င်းက ဆက်ပြောပြပါတယ်။
ဒါ့အပြင် မဲရုံပြုလုပ်နေရာတွေကို စစ်ကောင်စီတပ်ဖွဲ့ဝင်တွေ လုံခြုံရေးတင်းကြပ်ထားတယ်လို့ လားရှိုးမြို့ခံတွေက ပြောပါတယ်။
မနက်ဖြန် ဒီဇင်ဘာ ၂၈ ရက်မှာ စစ်ကောင်စီက ရွေးကောက်ပွဲ ပထမပိုင်းအဖြစ် မြို့နယ်ပေါင်း ၁၀၂ မြို့မှာ ရွေးကောက်ပွဲကျင်းပသွားမှာ ဖြစ်ပါတယ်။
ရှမ်းမြောက်မှာတော့ ရွေးကောက်ပွဲပထမအပိုင်းမှာလားရှိုး၊ မူဆယ်၊ နောင်ချိုမြို့နယ်တွေ ပါဝင်ပါတယ်။
လားရှိုးနဲ့ မူဆယ်မြို့ ရွေးကောက်ပွဲမှာ စစ်ကောင်စီရဲ့ကြံ့ခိုင်ရေးနှင့် ဖွံ့ဖြိုးရေးပါတီ-USDP၊ ပြည်သူ့ရှေ့ဆောင်ပါတီ- PPP နဲ့ ရှမ်းနှင့် တိုင်းရင်းသားများဒီမိုကရက်တစ်ပါတီ- SNDP တို့ ဝင်ရောက်ယှဥ်ပြိုင်မယ်လို့ သိရပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
