လွေးထွေး၊ ဖေဖော်ဝါရီ ၄ ရက်၊ တာချီလိတ်
ရှမ်းအရှေ့ တာချီလိတ်မြို့က ရပ်ကွက်တချို့နဲ့ ကားအရောင်းဆိုင်တချို့မှာ ရဲတပ်ဖွဲ့ဝင်က ဝင်ရောက် စစ်ဆေးပြီး လိုင်စင်မဲ့ ကားတွေကို ဖမ်းနေတယ်လို့ မြို့ခံအမျိုးသားတစ်ဦးရဲ့ ပြောပြချက်အရ သိရပါတယ်။
မနေ့ ဖေဖော်ဝါရီ ၃ ရက်မှာ တာချီလိတ်မြို့က ရဲတပ်ဖွဲနဲ့ ကျိုင်းတုံ ရဲတပ်ဖွဲ့ ပူးပေါင်းပြီး တာချီလိတ်ရှိ AAA ကားအရောင်းပြခန်းအပြင် တခြားသော ကားအရောင်းပြခန်းနဲ့ တာလော့ရပ်ကွက်၊ ဝမ်ကောင်းရပ်ကွက်မှ နေအိမ်တချို့က လိုင်စင်မဲ့ ကားတွေကို ဖမ်းနေတာပဲ ဖြစ်ပါတယ်။
တာလော့ရပ်ကွက်နေ အမျိုးသားတစ်ဦးက “မနေ့ နေ့လယ်ပိုင်းလောက် ဝင်စစ်တာ စလုပ်တယ်။ ကျနော်တို့ အိမ်ကတော့ မပါဘူး။ တချို့အိမ်က ကားတွေတော့ မောင်းမောင်းထွက်သွားတာ တွေ့ရတယ်။ ပတ်ဝန်းကျင်က ပြောတာတော့ လိုင်စင်မဲ့တွေ ဖမ်းတာတဲ့။ အရေအတွက်ကိုကျတော့ ဘယ်သူမှ မသိနိုင်ဘူး” လို့ ပြောပါတယ်။
မနေ့ ဖေဖော်ဝါရီ ၃ ရက်မှာ စဖမ်းတာဖြစ်ပြီး ဆက်လက် ဖမ်းဆီးစစ်ဆေးသွားမယ်လို့ နောက်ထပ် မြို့ခံအမျိုးသမီးတစ်ဦးက ရွှေဖီမြေကို ပြောပါတယ်။
“အခုလို လိုင်စင်မဲ့ ဖမ်းမယ်ဆို တစ်မြို့လုံးနီးပါး ဖမ်းရမှာပေါ့။ ဒီမှာက အခြေခံ လက်လုပ်လက်စားသမားပဲ။ လိုင်စင်ကားတော့ စီးနိုင်တဲ့လူ ရှားတယ်။ အဲဒီလိုက်ဖမ်းနေတဲ့ လူတွေကရော ဘာကားစီးလဲ မေးချင်တယ်”
တာချီလိတ်မြို့မှာ လိုင်စင်မဲ့ကားကို ရဲက ဖမ်းဆီးစစ်ဆေးတာဟာ ဟန်ရေးပြသက်သက်သာဖြစ်ပြီး စစ်ဆေးဖမ်းဆီးတဲ့သူကိုယ်တိုင်က လိုင်စင်မဲ့ကား စီးနေကြကြောင်း မြို့ခံတွေရဲ့ ပြောပြချက်အရ သိရပါတယ်။
အလားတူ ပြီးခဲ့တဲ့ ၂၀၂၄ ခုနှစ် နောက်ဆုံးလကလည်း ရှမ်းမြောက်က စစ်ကောင်စီတပ် ထိန်းချုပ်ထားတဲ့ မူဆယ်နဲ့ တခြားမြို့မှာ စစ်တပ်နဲ့ ရဲက လိုင်စင်မဲ့ကား ဖမ်းဆီးထိန်းသိမ်းထားပြီး ပိုင်ရှင်တွေက ငွေကျပ်သိန်း ဆယ်နဲ့ချီ ပြန်ရွေးယူရတဲ့ဖြစ်စဉ်လည်း ဖြစ်ပွားခဲ့ဖူးပါတယ်။
